देवळी : तालुक्याच्या चार दिशेने असलेल्या, पाच संतांचे वास्तव्य असलेल्या देवळी तालुक्याची ओळख संतांची भूमी म्हणून आहे. या संतांच्या भूमीत श्रीरामाची दोन मंदिरे आहेत. यातील एका मंदिराला दोन शतकांचा इतिहास आहे. सध्या अयोध्येत होत असलेल्या रामलल्लाच्या स्थापनेमुळे मोठ्या प्रमाणात धार्मिक आणि सामाजिक कार्यक्रम सुरू असल्याने संतांच्या या नगरीने भगवा रंग धारण केला आहे.

देवळी देशभक्ताच्या अस्तित्वामुळे नेहमीच चर्चेत असते. येथे साबाजी महाराज, मिरणनाथ महाराज, मनोहर महाराज, पांडे महाराज, दिनाशाहवली या संताचे अस्तित्व आहे. यामुळे या गावाची संतनगरी म्‍हणून ओळख आहे. या संताच्या नगरिमध्ये श्रीरामांची दोन मंदिरे आहेत. यातील एक जावंधिया यांच्या वाड्याजवळील मंदिर प्रसिद्ध आहे. दोनशे वर्षांपूर्वीच्या पुरातन मंदिर रायबहाद्दूर सेठ, गोपीकिशन जावंधिया यांनी दान दिलेल्या जागेमध्ये आजही उभे असून भाविकांचे श्रद्धास्थान झाले आहे.

या श्रीराम मंदिराच्या जीर्णोद्धाराचे काम गणपत महाराज यांनी केले. गणपत महाराज पोलिसमध्ये होते. त्यांनी आपले आयुष्य श्रीरामाच्या चरणी अर्पण करून साधणेतून संत म्‍हणून आपली ओळख निर्माण केली. संत गणपत महाराज देवळी पोलिस स्टेशनमध्ये खजिनदार म्‍हणून नोकरीला होते. त्‍यांनी देवळी ते रामटेकपर्यंत लोटांगण घालत जाऊन त्‍या ठिकाणी काही वर्षे येथे तपश्चर्या केली आणि परत देवळीला येऊन स्थायी झाले. येथे श्रीरामाच्या चरणी त्‍यांनी स्वतहाला वाहून घेतले. गणपत महाराजांनी श्री राममंदिराची नोंदणी केली. गणपत महाराज यांचा निःस्वार्थ भाव तसेच त्यांच्या ठायी असलेले प्रभू रामचंद्र यांच्या विषयीची आस्था अनुभवण्यात आली.

रामनवमीला तीन दिवस गणपत महाराज उत्सव

श्रीराम जन्मोत्सवासोबतच आषाढी शुध्द एकादशीला तीन दिवस गणपत महाराज उत्सव होतो. २२ जानेवारीला अयोध्येतील राम मंदिरात श्रीराम मूर्ती प्राणप्रतिष्ठा कार्यक्रम होत असल्याने मंदिरामध्ये विद्युत रोषणाई व श्रीराम मंदिर उत्‍सवाचे स्वरुप देण्यात येत आहे.