वरुड (अमरावती) : डोळ्यांसमोर सारे बुडताना दिसत होते आणि... आणि काही क्षणात सारेच दिसेनासे झाले. झुंज धबधबा येथे मंगळवारी (ता. १४) नाव उलटून अकरा जण बुडाल्याच्या दुर्घटनेतील बचावलेल्या श्याम मटरे याने हा सारा थरार अनुभवला. भावाचे निधन, त्यांच्या दशक्रियाचा कार्यक्रम अन् त्यावेळी कुटुंबातील अकरा सदस्यांचे वर्धा नदीच्या पात्रात डोळ्यासमोर बेपत्ता होण्याने श्याम मटरे हादरून गेला होता. आज त्याने हा थरार कथन केला.

वरुड तालुक्यातील बेनोडा शहीद पोलिस ठाण्याच्या हद्दीत येणाऱ्या झुंज धबधबा येथे मंगळवारी सकाळी दहा वाजताच्या सुमारास ही घटना घडली होती. या घटनेच्या वेळी १३ जण नावेत होते. त्यातील दोघे पोहत बाहेर आले; तर, तिघांचे मृतदेह कालच सापडले होते. मात्र अन्य आठ जण अद्यापही बेपत्ता आहेत. पाण्यात पडल्यावर पोहत काठावर आलेल्या श्याम मटरे याने आज त्यांच्या डोळ्यासमोर जे घडले त्याची माहिती दिली. त्यांनी सांगितले.

मोठ्या भावाचे निधन झाल्याने त्यांची राख शिरविण्यासाठी आम्ही परिवारातील सदस्य नावेत बसून जात होतो. काही अंतरावर आम्ही राख शिरविली, त्यानंतर परतीच्या प्रवासाला निघालो असता नदीचे पाणी अचानक वाढले व नाव अनियंत्रित होऊन उलटली. मी जावयाचा हात पकडला होता. त्यांना वाचविण्याचा प्रयत्न केला, मात्र त्यांचा हात सुटला. समोर नारायण मटरे हे पाण्यात बुडत असलेल्या दोन वर्षीय चिमुकलीला वाचविण्याचा प्रयत्न करीत होते. परंतु त्यांचा दम पुरला नाही व ते डोळ्यासमोरच मुलीसह बुडाले. काही क्षणातच काय होत आहे याचा थांगपत्ता लागत नव्हता. डोळ्यांसमोर सारे बुडताना दिसत होते, आणि काही क्षणात सारे दिसेनासे झाले.

स्वतः पाहिलेल्या या घटनेने श्याम मटरे पूर्णपणे हादरून गेले आहेत. प्रत्येक क्षण त्यांच्या नजरेसमोर येताच त्याचा जीव कासावीस होतो. त्याचे जावई, बहीण तसेच कुटुंबातील अन्य सदस्य दिसेनासे झाल्याने श्याम मटरे याची नजर आजसुद्धा वर्धा नदीच्या पात्रावर स्थिरावली आहे. दरम्यान, अमरावतीवरून जिल्हा शोध व बचाव पथकाचे वीस सदस्य कालपासूनच घटनास्थळी दाखल झाले असून शोधकार्य सुरू आहे.

नागपूर येथून राष्ट्रीय आपत्ती निवारण दल, राज्य आपत्ती निवारण दल, राज्य राखीव पोलिस दल तसेच स्थानिक पोलिस बुडालेल्या व्यक्तींचा शोध घेत आहेत. सायंकाळपर्यंत कुणाचाही शोध लागला नाही. त्यामुळे बुधवारची शोध मोहीम थांबवण्यात आली. उद्या गुरुवारी परत शोध सुरू होणार आहे.