ब्रह्मपुरी (जि. चंद्रपूर) : चॉकलेटचे आमिष दाखवून पाच वर्षीय चिमुकलीवर त्याच वॉर्डातील 30 वर्षीय नराधमाने लैंगिक अत्याचार केल्याची घटना येथील भगतसिंग चौकातील पेठवॉर्डात उघडकीस आली. याप्रकरणी पोलिसांनी गुन्हा दाखल करून अत्याचार करणाऱ्या युवकास अटक केली आहे. सचिन सुधाकर ऊर्फजयवंत बगमारे असे अटकेतील आरोपीचे नाव आहे. 

आईसोबत घरी असलेली चिमुकली अंगणात खेळत होती. त्यावेळी सचिन सुधाकर ऊर्फ जयवंत बगमारे घरी आला. त्याने चिमुकलीला चॉकलेट घेऊन देतो, असे सांगून तिला सोबत घेऊन जाऊ लागला. यावेळी पीडितेच्या आईने मुलीला कुठे नेत आहेस, असे विचारले. तेव्हा त्याने चॉकलेट घेऊन देतो, असे सांगितले. आईने मुलीला नेण्यास विरोध केला. परंतु, त्याने बळजबरीने तिला पाच मिनिटात चॉकलेट घेऊन आणून देतो, असे सांगून सोबत नेले. 

हेही वाचा - काकूच्या प्रेमात आकंठ बुडाला पुतण्या, काका ठरत होता अडसर... मग
 

मात्र, पाच-दहा मिनिटे होऊनही मुलगी घरी परतली नाही. त्यामुळे आईने दुकानाकडे बघितले. परंतु, मुलगी आणि आरोपी दोघेही दिसले नाही. त्या परिसरात खेळणाऱ्या दोन-तीन मुलांना सचिन आणि आपल्या मुलीबाबत विचारणा केली. तेव्हा त्या मुलांनी सचिन आपल्या घराकडे गेल्याचे सांगितले. त्यानंतर मुलीच्या आईने सचिनच्या घरी जाऊन बघितले. तेव्हा घराचा दरवाजा लावलेला होता.

दरवाजा वाजविल्यानंतर तो घराबाहेर आला. मुलीबाबत विचारणा केली. यावेळी घराजवळील नागरिकही गोळा झाले. काही वेळानंतर मुलीला घराबाहेर काढले. यावेळी मुलीला घडलेल्या प्रकाराबाबत विचारणा केली असता तिच्या सांगण्यानुसार अत्याचार करण्यात आल्याची शंका आली. 

यानंतर सचिनने घरून पळ काढण्याचा प्रयत्न केला. मात्र, नागरिकांनी पकडून त्याला चांगलाच चोप दिला. पीडित मुलीचे वडील शेतातून घरी आल्यानंतर सर्व प्रकार सांगितला. त्यानंतर ब्रह्मपुरी पोलिस ठाण्यात तक्रार दाखल करण्यात आली. पोलिसांनी विविध कलमान्वये गुन्हा दाखल करून त्याला अटक केली. पुढील तपास सतीश गुरनुले करीत आहेत.