काकूच्या प्रेमात आकंठ बुडाला पुतण्या, काका ठरत होता अडसर... मग

अमरावती : कौटुंबिक नातेसबंधामध्ये परस्परांवर विश्वास असला तर संसाराची गाडी नीट चालते. परंतु विश्वास, एकमेकांबद्दलची आपुलकी संपली की, विकृती जन्म घेते. मनातील वाईट विचार त्या व्यक्तीला कोणत्या स्तरावर नेऊन ठेवतील, याचा काहीच नेम नसतो. अमरावतीत शहरातील एका महिलेबाबतही नेमकं हेच झालं. पती अन् दोन अपत्यांबाबत कोणताही विचार न करता तिने पुतण्याला हाताशी धरले. पुढे जे झालं ते माणुसकीला नक्कीच काळीमा फासणारंच होतं. असे करण्यामागे तिचा वैयक्तिक स्वार्थ होता. ही बाब पोलिसांच्या प्राथमिक तपासातून पुढे आली. किंबहुना चौकशीमध्ये ती महिला आणि तिच्या पुतण्याने तशी कबुलीसुद्धा आपल्या बयाणामध्ये नागपुरीगेट पोलिसांपुढे दिली.

५ जूनच्या रात्रीच्या सुमारास सुकळी रसूलापूर गावात ही घटना घडली. खुनाच्या घटनेतील संशयितांना अटक केल्यावर तसेच त्यांच्या कबुलीजबाबानंतर या घटनेला अनैतिक संबंधाची किनार असल्याचे स्पष्ट झाले. असे पोलिस निरीक्षक अर्जुन ठोसरे यांनी सांगितले. गोवर्धन शेषराव मेश्राम (वय ४५) असे मृत व्यक्तीचे नाव आहे. आशीष भीमराव मेश्राम (वय २३) हा खूनप्रकरणातील सूत्रधार निघाला. तो मृत गोवर्धनचा पुतण्या आहे.

- अमरावतीच्या या भागातही शिरला कोरोना...औषधी विक्रेत्यासह नऊ जणांना लागण 

आशीषचे गोवर्धनच्या घरी काही महिन्यांपासून येणे जाणे वाढले होते. लॉकडाउन सुरू झाले. अन् हाताला काम नसल्यामुळे गोवर्धन अडीच महिन्यांपासून घरीच होता. त्यामुळे गोवर्धनच्या घरी केव्हाही जाणे, आशीषला शक्य नव्हते. भेटीची ओढ, त्यात गोवर्धनचा अडसर, ही बाब आशीषच्या मनात सलत होती. त्याने अखेर काकाचा काटा काढण्याचा प्लॅन रचला.
 
त्याने घेतली मित्रांची मदत
घटनेच्या दिवशी आशीषने काकाला घरातून बाहेर नेऊन आधी दारू पाजली. आशीषनेही दारू ढोसली. परंतु तो शुद्धीवर होता. त्याने काकाचा खून करण्यासाठी मंगेश अशोक घोडेस्वार, रमेश गंगाराम काळे या दोन मित्रांची मदत घेतली. आशिषने दारूच्या नशेत काकाचा खून केला. त्याच्या मित्रांनी कशाचाही विचार न करता या कामासाठी साथ दिल्याने त्यांच्यावरही गजाआड होण्याची वेळ आली.

- नागपुरात हत्याकांडांची मालिका; तडीपार गुंडाचा खून 

पोलिसांचे दहा तासांचे प्रयत्न महत्त्वाचे
नागपुरीगेट पोलिसांनी याप्रकरणी आधी अनोळखी व्यक्तीविरुद्ध गुन्हा दाखल केला होता. त्यानंतर घटनेचा उलगडा करण्यासाठी सुकळी रसूलापूर हे गाव गाठले. अन् दुसऱ्य दिवशी पहाटे साडेपाच ते सहा वाजेपर्यंत पुतण्याला अटक केली. त्याच्याकडून मिळालेल्या कबुलीजबाबानंतर पोलिस निरीक्षक अर्जुन ठोसरे, सहायक पोलिस निरीक्षक मंगेश मोहोड यांनी तपासाला गती दिली. अन् तीन दिवसांतच मृत व्यक्तीची पत्नी व आशिषच्या मित्रांनाही अटक केली. आता सर्वच जण न्यायालयीन कोठडीअंतर्गत मध्यवर्ती कारागृहात आहेत.