लाखनी (जि. भंडारा) : येथील कोविड केअर सेंटरच्या मागील बाजूस असलेल्या क्रीडा संकुलानजीक स्वच्छतागृहाजवळ मोकळ्या जागेत पीपीई किट फेकल्याचा धक्कादायक प्रकार उघडकीस आला आहे. यामुळे परिसरात कोरोना संसर्गाचा धोका निर्माण झाला आहे.

याबाबत निष्काळजीपणा दाखवणाऱ्या कर्मचाऱ्यांवर कारवाई करण्याची मागणी नागरिकांनी केली आहे. कोविड-१९ संसर्गजन्य विषाणूंचा प्रादुर्भाव सुरू असल्याने रुग्ण संख्येत सातत्याने वाढ होत आहे.

त्यामुळे जिल्हास्तरावर रुग्णालयात जागा अपुरी असल्याने प्रत्येक तालुक्‍यात कोविड केअर सेंटर सुरू करण्यात आले आहेत. तालुकास्तरावर शासकीय इमारतीत हे सेंटर सुरू केले असून, तालुक्‍यातील बाधितांवर तेथे तपासणी व उपचार केले जातात.

अवश्य वाचा : कोरोनाकाळात ज्येष्ठमध आहे सर्वात गुणकारी; सर्दी, खोकल्यापासून बचावासाठी रामबाण उपाय

शास्त्रीय पद्धतीने नष्ट करा

येथे जिल्हा परिषद गांधी विद्यालयात कोरोनाबाधितांना ठेवले जाते. या रुग्णांवर उपचार करणारे डॉक्‍टर, आरोग्य कर्मचारी तथा इतरांना संसर्ग होऊ नये म्हणून पीपीई किट घालून तपासणी व उपचार करण्याच्या शासनाच्या मार्गदर्शक सूचना आहेत. या पीपीई किटचा उपयोग केल्यानंतर त्या शास्त्रीय पद्धतीने नष्ट केल्या जातात.

आरोग्य विभागाने लक्ष द्यावे

कोविड केअर सेंटरमध्ये कार्यरत कर्मचाऱ्यांच्या निष्काळजीपणामुळे केंद्राच्या मागील भागात क्रीडा संकुलाजवळ स्वच्छतागृह परिसरात खुल्या जागेत पीपीई किट फेकलेल्या आढळून आल्या. या प्रकाराची माहिती होताच परिसरातील नागरिकांनी घटनेबद्दल नाराजी व्यक्त केली. यामुळे परिसरात कोरोना संसर्गाची शक्‍यता असल्यामुळे संबंधित यंत्रणेने लक्ष देण्याची गरज आहे.

जाणून घ्या : पायदळ जाताय ना, मग मोबाईलवर बोलू नका; चोरटे आहेत तुमच्या मागावर!

थर्मामीटरशिवाय तपासणी सुरू

भंडारा : शहरात आशा कार्यकर्त्या व आरोग्य कर्मचाऱ्यांकडून ‘माझे कुटुंब माझी जबाबदारी’ उपक्रमातून कुटुंबांचे सर्वेक्षण करण्यात येत आहे. मात्र, गांधी चौक परिसरात आज, आरोग्य कर्मचाऱ्यांनी संबंधित कुटुंबीयांची ऑक्‍सिमीटरने तपासणी केली. त्यांना थर्मामीटरबाबत विचारले असता मीटर बिघडल्याचे त्यांनी सांगितले. याबाबत नागरिकांनी नगरसेवकांकडे तक्रार केली आहे.

(संपादन : दुलिराम रहांगडाले)