Viral Video About Mask: गेल्या काही दिवसांपासून देश कोरोनाच्या (Corona) तिसऱ्या लाटेशी झुंज देत आहे. एकीकडे कोरोनाचा प्रादुर्भाव वाढत असताना दुसरीकडे मात्र कोरोनाच्या बाबतीत अनेक समज गैरसमज असल्याचे समोर येतंय. कोरोनापासून वाचण्यासाठी महत्त्वाच्या काही मार्गांपैकी एक म्हणजे मास्क वापरणे होय. परंतु एका व्हायरल व्हिडीओमध्ये (Viral Video) मास्कच्या बाबतीत खळबळजनक दावा करण्यात आलाय. डिस्पोजेबल सर्जिकल मास्कमध्ये (Surgical Mask) जंतू (Germs) असतात, असे या व्हिडीओमध्ये सांगण्यात आलंय. परंतु या व्हिडीओमागचं सत्य काय हे आपण पाहणार आहोत.

व्हिडीओमध्ये नेमकं काय आहे? (What exactly is in the video?)

व्हायरल व्हिडीओमध्ये एक व्यक्ती डिस्पोजेबल सर्जिकल मास्कला माचिसने आग लावत आहे. त्याच्याबाजूला काही लोकही उभे असल्याचं दिसतंय. आग लागणारा व्यक्ती म्हणतोय की, हा मास्क उकळलेल्या पाण्यात टाकून दोन मिनिटे ठेवला तर त्यात तारेसारखे बारीक बारीक काळ्या रंगाचे जंतू दिसतात. आपण हा मास्क लावल्यामुळे ते जंतू शरीरात जातात आणि त्यामुळे आपल्याला कोरोना होतो. असा दावा या व्हिडीओमध्ये केला आहे. त्यामुळे या मास्कला बायकॉट केलं आणि त्याला नष्ट केल्याचं या व्हायरल व्हिडीओमध्ये संबंधित व्यक्तीने सांगितलंय

काय आहे सत्य (Fact Check)-

दरम्यान सदर व्हायरल व्हिडीओची पडताळणी केल्यानंतर हा दावा साफ खोटा असल्याचं PIB Fact Check या ट्विटर हॅण्डलवरून सांगण्यात आलंय. वैज्ञानिक मानकांनुसार बनवलेल्या कोणत्याही मास्कमध्ये जंतू नसतात तसेच नाक आणि तोंड व्यवस्थित झाकणारा कोणताही मास्क कोरोनापासून बचाव करण्यासाठी वापरला जाऊ शकतो.