Gold : देशाच्या सोने आयातीत वार्षिक ७९ टक्के घट

मुंबई - देशातील डिसेंबरमधील सोन्याची आयात वार्षिक तुलनेत ७९ टक्क्यांनी घटली असून, गेल्या दोन दशकातील ही मासिक नीचांकी आयात आहे. स्थानिक बाजारपेठांमध्ये सोन्याच्या भावाने उच्चांक गाठल्याने मागणी कमी झाली आहे, त्यामुळे आयातही कमी झाली असल्याचे सरकारी सूत्रांनी सांगितले.

जगातील दुसरा सर्वांत मोठा सोने आयातदार देश असलेल्या भारताने कमी सोने आयात केल्याने जागतिक व्यापारावर परिणाम होऊ शकतो. विशेषतः सोने व्यापारातील नफ्याने आठ महिन्यांतील सर्वोच्च पातळी गाठलेली असताना आयात घटल्याने त्याला मर्यादा येऊ शकते. सोने आयात कमी झाल्याने देशाची व्यापारी तूटही कमी होऊ शकते आणि रुपयालाही पाठबळ मिळू शकते.

भारताने डिसेंबरमध्ये २० टन सोने आयात केले. एका वर्षापूर्वी याच महिन्यात ९५ टन सोने आयात करण्यात आले होते, असे एका सरकारी अधिकाऱ्याने सांगितले. मूल्याच्या दृष्टीने, डिसेंबर २०२२मध्ये आयात केलेल्या सोन्याचे मूल्य आयात १.१८अब्ज डॉलर आहे, जे एका वर्षापूर्वी याच महिन्यात ४.७३ अब्ज डॉलर होते, असेही या अधिकाऱ्याने सांगितले. कॅलेंडर वर्ष २०२२ मध्ये देशातील सोन्याची एकूण आयात ७०६ टन इतकी आहे. वर्ष २०२१ मध्ये ती १०६८ टन होती, असेही सरकारी अधिकाऱ्यांनी स्पष्ट केले.