RBI monetary policy: रिझर्व्ह बँकेचं पतधोरण जाहीर; आर्थिक वाढ, महागाई, GDP किती राहील जाणून घ्या

मुंबई : रिझर्व्ह बँक ऑफ इंडियानं आपलं पतधोरण जाहीर केलं आहे. त्यानुसार २०२३-२४ आर्थिक वर्षातील चौथ्या तिमाहीत महागाईचा दर ५.६ टक्के राहण्याचा अंदाज वर्तवण्यात आला आहे. गव्हर्नर शक्तीकांत दास यांनी पत्रकार परिषदेत ही माहिती दिली.

जीडीपी वाढीचा दर 'इतका' राहील

पतधोरण समितीच्या बैठकीनंतर पत्रकार परिषदेत गव्हर्नर शक्तीकांत दास यांनी आर्थिक वाढ, जीडीपी आणि महागाई यावर भाष्य केलं. दास म्हणाले, जीडीपी वाढीचा दर हा ६.४ टक्के राहण्याचा अंदाज वर्तवण्यात आला आहे. यांपैकी पहिल्या तिमाहीत ७.८ टक्के, दुसऱ्या तिमाहीत ६.२ टक्के तिसऱ्या तिमाहीत ६ टक्के तर चौथ्या तिमाहीत ५.८ टक्के राहिल असंही त्यांनी म्हटलं आहे.

महागाईचा दर 'इतका' राहील

तर यंदाच्या २०२३-२४ च्या आर्थिक वर्षात महागाई ६.५ टक्के राहण्याचा अंदाज आहे. तर यंदा पाऊस सर्वसामान्य राहिला तर सीपीआय महागाई ५.३ टक्के राहण्याचा अंदाज आहे, असंही दास यांनी पत्रकार परिषदेत सांगितलं.

रेपो रेटमध्ये वाढ

दरम्यान, रिझर्व्ह बँकेनं रेपो रेटमध्ये ०.२५ टक्के वाढ करण्यात आली असून त्यामुळं हा रेट ६.५ टक्क्यांवर पोहोचला आहे. यामुळं सर्व मोठ्या कर्जांचे हप्ते महागणार आहेत. यामध्ये गृहकर्ज, वाहन कर्ज यांचा समावेश आहे. त्याचबरोबर ठेवींवरील व्याजदरातही वाढ होईल त्यामुळं हा छोटासा दिलासाही असेल, असं सांगितलं जात आहे.