Ramalinga Forest : बिचाऱ्या शेतकऱ्यांचं अरण्यरुदन सुरूये; हे ऐकून वाघ म्हणाला, "‌..तर मी काय करू?" वनविभागानं बिबट्या पकडला, पण..

दुपारचं पिवळं उन्ह. (थंडी गुलाबी असते म्हणून उन्ह आपलं पिवळं.) धाराशिव जिल्ह्यातील‌ रामलिंग अरण्य (Ramalinga Forest Dharashiv). पिवळ्याधमक झाडीत सळसळ झाली. डेरेदार घावड्याच्या झाडावर आळसावलेल्या वानरांच्या टोळीतील महाळ्या वानराची तंद्री भंगली. उगाच आपल्या प्रेयसीनं 'जेवलास का? काय खाल्लं?' असं वेळी-अवेळी विचारून डोकं खाऊ नये म्हणून तिच्या केसात डोळे खुपसून उवा मारत असलेल्या तरणताठ्या हंपी वानराचा बीपी हाय झाला. चंम्पी बाळ भेदरलं. त्यानं इकडं-तिकडं काहीच न पाहता आपल्या आईच्या कुशीला आणखी घट्ट आवळलं.