Video : ShivJayanti 2020 : गाडीवरून गड घेऊन फिरणारा अनोखा शिवभक्त... 

कागल येथील पोलिस ठाण्यात एक दुचाकी उभी केली होती. ती सर्वांचेच लक्ष वेधून घेत होती. अनेक जण आपल्या मोबाईलमध्ये तिची छायाचित्रे टिपत होते. कर्नाटक पासिंगची ही मोटारसायकल निपाणी येथील एका शिवभक्ताने छत्रपती शिवाजी महाराजांना मुजरा करण्यासाठी सजवली आहे. या शिवभक्ताचे नाव आहे, सागर अशोक खांबे. दुचाकीसमोरील बाजूस शिवाजी महाराजांचा दरबार आहे. येथे राजे आणि काही मावळे आहेत.

त्यावरील बाजूला "राजगड राजधानी, रायगड राजधानी' असे लिहिले आहे. त्याविषयी ते सांगतात, ""छत्रपतींची पहिली राजधानी राजगड होती. त्यानंतर रायगड झाली. त्यामुळे ही नावे लिहिली आहेत.'' दुचाकीवर ठिकठिकाणी गड-किल्यांची सुमारे 90 नावे आहेत. काही ठिकाणी शिवरायांच्या मावळ्यांची नावे आहेत. भगवे ध्वज आहेत. वाघ, ढाल-तलवारी आहेत. छोट्या तोफा आहेत.

बाजीप्रभू देशपांडे यांचे चित्र असून, त्याखाली छत्रपतींच्या सुटकेखातर यमालाही पावनखिंडीत थांबविणारा वीर योद्धा म्हणजे बाजीप्रभू देशपांडे असे ठळक अक्षरात लिहिले आहे. बाजीप्रभू देशपांडे यांच्याविषयी ते म्हणतात, ""बाजीमधील बा म्हणजे ते बाप होते. जी म्हणजे जिगरबाज होते.'' माझ्या राजामुळे आज देव देवळात आहे, यांसारख्या ओळीही लिहिल्या आहेत. हॅंडलसमोर शिवा काशीद यांना मानाचा मुजरा असे लिहिले आहे. ते अगदी चालकाच्या नजरेसमोर येते.

याविषयी ते म्हणाले, "शिवा काशीद हे प्रति शिवाजीच होते.' त्याखाली शहाजीराजे, राजमाता जिजाऊ, शिवाजीराजे, संभाजीराजे यांना मानाचा मुजरा अशी अक्षरे लिहिली आहेत. मागील बाजूस सरसेनापती हंबीरराव मोहिते यांचे नाव मोठ्या अक्षरात लिहिले आहे. त्याखाली "मुजरा आपल्या मावळ्यांना, जे स्वराज्यरक्षक होते', असे लिहून स्वराज्यासाठी लढलेल्या सर्व मावळ्यांना अभिवादन केले आहे. तानाजी मालुसरे यांना अभिवादन केले. आणखी नावे घालायची आहेत. जसे जमेल तसे हे करीत असल्याचे खांबे सांगतात. 

खांबे हे निपाणीतील एका भांडी कारखान्यात नोकरीस आहेत. सायंकाळी एका चायनीज सेंटरवर काम करतात. शिवरायांविषयी त्यांच्या मनात आदरभाव आहे. त्यामुळेच त्यांनी हा छंद जोपासला. भांडी कारखान्यातील नोकरीतून घर चालू शकते. सायंकाळी मित्रांत बसून गप्पाटप्पा करण्यापेक्षा चायनीज सेंटरवरील काम धरले. या पैशांमधून गाडीच्या सजावटीचा छंद जोपासत असल्याचे त्यांनी सांगितले. सुरवातीला घरच्यांचा विरोध होता. परंतु, मी माझा छंद चार-पाच वर्षांपासून जोपासत असल्याचे ते सांगतात. शिवजयंतीला गाडीची सजावट देखणी असते. गाडीला दोन छोटे स्पीकर जोडले असून, त्यावर शिवरायांची गाणी लावलेली असतात.