कोरोना व्हायरसच्या निमित्ताने व्हायरस वरील चित्रपट  होताहेत व्हायरल...  

सध्या जगभरात कोरोना व्हायरसने धुमाकूळ घातला आहे. जागतिक महासत्ता अमेरिकेसह इटली, स्पेन, भारत, चीनसह अन्य देशांना या व्हायरसचा तडाखा बसला आहे. देशात 21 दिवसांचा लॉकडाउनमुळे अर्थव्यवस्थेला मोठा धक्का बसला आहे. एका व्हायरसमुळे मानवजातीची अपरिमित हानी झाली आहे. लोक घरात बंदिस्त जीवन जगताहेत. तसा वायरस हा विषय सिनेसृष्टीला नवीन नाही. त्यातही व्हॉलिवुड चित्रपटांमध्ये अज्ञात व्हायरस किंवा साथीच्या रोगाचा प्रसार या विषयावर आत्तापर्यंत अनेक चित्रपट प्रदर्शित झाले आहेत. कोरोनाच्या पार्श्‍वभूमीवर, अर्थात, त्याच्याशी मिळता-जुळता चित्रपट 2011 मध्ये प्रदर्शित झाला आहे. कंटेजन हा व्हाॅलिवुडपट सध्या पुन्हा एकदा चर्चेत आला आहे. चीनमधून अमेरिकेत आलेला व्हायरस लाखो लोकांचे बळी कसा घेतो आणि त्यापासून बचावासाठी औषध विकसित करण्यावर चित्रपटाची कथा आधारित आहे. विशेष म्हणजे, या चित्रपटात व्हायरस प्रतिबंधासाठी सोशल डिस्टन्स, क्वारंटाईन व आयसोलेशनसारख्या उपायांचा उल्लेख केला गेला आहे. 

गेल्या वर्षी मल्याळम चित्रपट प्रदर्शित झाला होता. त्याचे नावही व्हायरस होते. हा चित्रपट 2018 मध्ये फैलावलेल्या निपाह व्हायरसवर आधारित होता. याशिवाय 1995 मध्ये आउटब्रेक नावाचा व्हाव्लिवुड चित्रपट प्रदर्शित झाला होता. या चित्रपटाला मेडिकल डिझास्टर संबोधले गेले आहे. "द हॉट जोन' नावाच्या नॉन फिक्‍शन पुस्तकावर हा चित्रपट बेतलेला होता. आफ्रिकन देशातून आलेला एक व्हायरस अमेरिकेत पसरल्यानंतर निर्माण झालेल्या परिस्थितीवर हा चित्रपट भाष्य करतो. त्यानंतर 2000 मध्ये प्रदर्शित झालेला अमेरिकन थ्रीलर क्वारंटाईन चित्रपटही व्हायरस हल्ल्यावर आधारलेला आहे. ज्यामध्ये एक दहशतवादी संघटन व्हायरसला हत्यार बनवून जगावर हल्ला करताना दाखवलेले आहे. याचबरोबर रेसीडेंट ईव्हील सिरीज, वर्ल्ड वॉर जेड, आई एम लिजेंड आदी सिनेमांचा समावेश आहे. असे चित्रपट व्हायरलही होताहेत. 
चित्रपट हा समाजाचा आरसा आहे. समाजात जे काही चांगले किंवा वाईट घडते, त्याचे प्रतिबिंब त्यात पडलेले दिसते. काही चित्रपट सत्य घटनांवर तर काही काल्पनिक कथेवर आधारित असतात. मात्र, बऱ्याचदा अशा काही चित्रपटांतूनदेखील भविष्यात येणाऱ्या संकटाची, धोक्‍याची चाहूल वा संकेत किंवा पूर्वकल्पना दिली गेली असते तसेच या संकटावर कशी मात करावी किंवा यातून स्वरक्षण कसे करावे, यावरही भाष्य केलेले दिसते. कोरोनाचा वाढता प्रादुर्भाव आणि यापूर्वी व्हायरसवर आधारलेले काही चित्रपट आपल्याला हेच तर सांगत नसतील ना? 
 
व्हायरसवर प्रदर्शित काही चित्रपट 

• आउटब्रेक : 1995 
• 28 डेज लॅटर : 2002 
• आय ऍम लिजंड : 2007 
• ब्लाईन्डनेस : 2008 
• डुम्सडे : 2008 
• कॅरिऍर्स : 2009 
• कंटेजन : 2011 
• वर्ल्ड वॉर : 2013 
• मॅजीई : 2015 
• पॅनडेमिक : 2016