Guru Purnima 2023 : गुरुपौर्णिमेला साईबाबांच्या पूजेचं काय आहे महत्व? जाणून घ्या

Sai Baba Shirdi Guru Purnima Importance : गुरु पौर्णिमेला साईबाबांच्या पूजेला भक्त विशेष महत्व देतात. यासाठी भाविक गावागावातून साईबाबांच्या दर्शनासाठी शिर्डीमध्ये येतात. साई सच्चरित वरून मानले जाते की, साई बाबांची पूजा गुरु पौर्णिमेदिवशी प्रथम तात्या साहेब नूलकर यांनी केली होती. असे मानले जाते की, साई बाबांनी आपल्या भक्तांना गुरूंची पूजा करण्याचे ज्ञान दिले होते.

गुरुपौर्णिमा हा गुरुकडून आशीर्वाद प्राप्त करून घेण्याचा दिवस आहे. गुरू या शब्दाची उत्पत्ती हि 'गु' आणि 'रू' या शब्दांपासून झाली आहे. 'गु' या शब्दाचा अर्थ 'अज्ञानाचा अंधार' आणि 'रु' या शब्दाचा अर्थ 'याला दूर करणारा' असा होतो.

देश विदेशातील लाखो लोक साई बाबांचे भक्त आहेत. गुरुपौर्णिमेला जगाच्या कानाकोपऱ्यातून साई बाबांचे भक्त दर्शनासाठी येतात. साईसच्चरितच्या १७ व्या अध्यायामध्ये लेखक हेमाडपंत यांच्याकडून गुरूंचे महत्व सांगण्यात आले आहे.

हेमाडपंत सांगतात की, रोज शास्त्रग्रंथ ऐकले पाहिजेत. पूर्ण श्रद्धेने आपल्या गुरुंचे आपण ऐकले पाहिजे. यामुळे आपण आपल्या ध्येयापासून कधीही विचलित होत नाही आणि आपण आपल्या जीवन उद्धाराकडे मार्गस्थ होतो. गुरुच्या उपदेशाने अगणित लोकांचा उद्धार होतो, आणि त्यांच्या मोक्षाचा मार्ग मोकळा होतो.

पुढे हेमाडपंत सांगतात की, चांगल्या शास्त्रांचे वाचन करा किंवा ते ऐका. पूर्ण श्रद्धेने आणि आदरपूर्वक आपल्या गुरूंच्या चरणी लीन व्हा. त्यानंतर गुरु आपले आयुष्य ज्ञानाने उजळून टाकतील. गुरुंच्या सेवेत आपले सर्वस्व अर्पण करा.

गुरूंकडून ज्ञान आणि मोक्ष यांच्याबद्दल माहिती घेतली पाहिजे. गुरूकडून उत्तम ज्ञानाची प्राप्ती होते आणि ती आपले आयुष्य सुखकारक बनवते.