चालू आर्थिक वर्षात दूरसंचार क्षेत्रामध्ये १.२६ लाख तरुणांना रोजगार मिळणार, अहमदाबाद येथे प्रशिक्षण केंद्र

नवी दिल्लीः चालू आर्थिक वर्षामध्ये दूरसंचार तंत्रज्ञान क्षेत्रात १.२६ लाख तरुणांना रोजगार मिळणार असल्याची माहिती टेलिकॉम सेक्टर मधील उच्चपदस्थ अधिकाऱ्याने दिली.

टेलिकॉम सेक्टर स्किल कौन्सिलने (TSSC) अहमदाबाद येथील स्किल युनिव्हर्सिटी येथे नोकियाच्या सहकार्याने कौशल्य विकास प्रशिक्षणासाठी नवीन सेंटर ऑफ एक्सलन्सची स्थापना केली आहे.

टीएसएससी या आर्थिक वर्षात १.२६ लाख तरुणांना प्रशिक्षण देईल आणि त्यांना उद्योगाच्या माध्यमातून रोजगार मिळेल, असं विधान टीएसएससीचे सीईओ अरविंद बाली यांनी केलं आहे. नोकियासह नवीन केंद्राच्या लाँचिंग कार्यक्रमावेळी त्यांनी हे सांगितलं.

आयटीआय कुबेरनगर येथील सेंटर ऑफ एक्सलन्स येथे 5G तंत्रज्ञान आणि कौशल्यांचं प्रशिक्षण देण्यासाठी एक केंद्र स्थापन करीत आहे. त्याद्वारे ७० टक्के विद्यार्थ्यांना अभ्यासक्रम पूर्ण झाल्यानंतर ४ ते ६ आठवड्यांमध्ये प्लेसमेंट ऑफर मिळेल. प्रकल्पाच्या पहिल्या वर्षामध्ये ३०० उमेदवारांना या उपक्रमाचा लाभ होणार आहे.

नोकिया इंडियाचे उच्चपदस्थ अधिकारी अमित मारवाह यांनी सांगितलं की, पंतप्रधान मोदी यांच्या डिजिटल इंडियाच्या दृष्टीकोनाला पाठिंबा देणारा हा उपक्रम आहे. दूरसंचार तंत्रज्ञानातील नाविन्यपूर्ण क्षेत्रात काम करणारी नोकिया आघाडीवर आहे. आम्ही. 5G इकोसिस्टम तयार करण्यासाठी आम्ही मनुष्यबळ विकसित करीत आहोत.

नोकियाने सामाजिक जबाबदारीचा भाग म्हणून CoE साठी पायाभूत सुविधा आणि प्रशिक्षणासाठी गुंतवणूक केली आहे. गुजरातचे कामगार, कौशल्य विकास आणि रोजगार मंत्री बलवंतसिंह राजपूत यांच्या हस्ते या केंद्राचे उद्घाटन झाले.