भाजपकडून आमदारांना 60 कोटींची ऑफर : जितू पटवारी

नवी दिल्ली : भाजपकडून लोकशाहीची हत्या  करण्यात येत असून, भाजपने आमच्या आमदारांना 50-60 कोटींची ऑफर देण्यात येत आहे. आमचे काही आमदार बंगळूरमध्ये असले तरी संपर्कात आहेत, असे मध्य प्रदेशातील मंत्री जितू पटवारी यांनी म्हटले आहे.

मध्य प्रदेशात मंगळवारी रात्रीपासून राजकीय घडामोडींना वेग आल्याने मुख्यमंत्री कमलनाथ सरकार अडचणीत आल्याचे बोलले जात आहे. भाजपने ऑपरेशन लोटस सुरु केले असून, काँग्रेसच्या काही आमदारांना हरियाना व कर्नाटकात नेले आहे. काँग्रेसचे मोठे नेते आणि आदिवासी आमदार बिसाहुलाल सिंग यांच्यासह सुमारे आठ आमदारांना भाजप नेत्यांसमवेत गुरुग्राममधील हॉटेलमध्ये ठेवण्यात आले आहे. काँग्रेसच्या आमदारांसह बसपचे आमदार रामबाई हेदेखील आहेत. कमलनाथ सरकारमधील दोन मंत्री जयवर्धन सिंह आणि जितू पटवारी गुरुग्राम येथे पोहोचले. तेथून त्यांनी काँगेस आमदारांना सुरक्षित ठिकाणी नेले आहे. 

यानंतर जितू पटवारी यांनी भाजपवर आरोप करत म्हटले आहे, की पंतप्रधान नरेंद्र मोदी सतत वेगळ्या पद्धतीच्या राजकारणाबाबत बोलत असतात. हेच का ते वेगळ्या प्रकारचे राजकारण आहे. आमच्या आमदारांना 50-60 कोटींची ऑफर देण्यात येत आहे. या सर्व घडामोडींमागे शिवराजसिंह चौहान आहेत. सध्या व्हायरल होत असलेल्या व्हिडिओ-ऑडिओवरून हेच स्पष्ट होत आहे. मध्य प्रदेशातील सरकारला काही धोका नाही.