संतापजनक! TV दाखवण्याच्या बहाण्यानं तीन वर्षांच्या चिमुरडीवर बलात्कार; 50 वर्षीय आरोपीला अटक

Indore Crime News : इंदूरमध्ये आजीच्या घरी आलेल्या तीन वर्षांच्या मुलीवर एका 50 वर्षीय व्यक्तीनं बलात्कार केला. मुलीच्या प्रायव्हेट पार्टमध्ये दुखू लागल्यावर तिनं हा प्रकार आईला सांगितला. पोलिसांनी आरोपीला अटक केलीये.

आरोपीनं मुलीला टीव्ही पाहण्याच्या बहाण्यानं घरी बोलावलं होतं. मुलगी त्याला नाना म्हणते. राजेंद्र नगर पोलिसांनी दिलेल्या माहितीनुसार, मुलीची आई मूळची खरगोनची रहिवासी असून ती तीन मुलांसह इंदूरच्या राजेंद्र नगरमध्ये तिच्या आईच्या घरी आली होती. घराशेजारी राहणाऱ्या रामसिंग जदवाडचंद यांच्या घरी मुलं टीव्ही पाहण्यासाठी जात असत.

2 जानेवारीला रामसिंगनं तिन्ही मुलांना टीव्ही पाहण्यासाठी बोलावलं होतं. टीव्ही पाहून दोन मुलं परत घरी आली. मात्र, तीन वर्षांची मुलगी टीव्ही बघून घरी परतली नाही. आईला संशय आल्यावर तिनं मोठ्या मुलीला रामसिंगच्या घरी बघायला पाठवलं. दरवाजा उघडल्यानंतर रामसिंग तीन वर्षीय मुलीसह आतमध्ये होता. नंतर मुलगी रडत बाहेर आली, पण आईनं याकडं दुर्लक्ष केलं.

आरोपीला पाहताच मुलगी रडू लागली

दुसऱ्या दिवशी रामसिंग महिलेच्या घरी आला आणि मुलीला आपल्या कुशीत घेऊ लागला. त्याला पाहताच मुलगी ढसाढसा रडू लागली. आईला संशय आला आणि तिनं मुलाची विचारपूस केली. त्यावेळी मुलीनं हातवारे करून तिच्या प्रायव्हेट पार्टमध्ये दुखत असल्याचं सांगितलं आणि ती रडू लागली. गुरुवारी रात्री आईनं पोलीस ठाणं गाठून आरोपी रामसिंगविरुद्ध गुन्हा दाखल केलाय. पोलिसांनी रात्री उशिरा त्याला अटक केलीये.