आसाम : काँग्रेसला हादरा, आमदार करणार भाजपात प्रवेश

गुवाहाटी - आसाममधील काँग्रेसचे महत्त्वाचे नेते आणि विद्यमान आमदार रुपज्योती कुर्मी यांनी गुरुवारी पक्षाला रामराम केला. रुपज्योती लवकरच भाजपात प्रवेश करणार आहेत. काँग्रेसमध्ये तरुणांऐवजी ज्येष्ठ नेत्यांना प्राधान्य दिले जाते, असा आरोप करत त्यांनी काँग्रेसला सोडचिठ्ठी दिली. कुर्मी यांच्यापाठोपाठ काँग्रेसचे आणखी चार आमदार पक्ष सोडण्याच्या तयारीत असल्याचे वृत्त असून काँग्रेससाठी हा मोठा धक्का मानला जात आहे.

रुपज्योती हे रुपम कुर्मी यांचे पुत्र असून ते चार वेळा मरिआनी या मतदारसंघातून विधानसभेत निवडून आले आहेत. दिल्ली आणि गुवाहाटीमधील काँग्रेसचे नेते तरुणांऐवजी ज्येष्ठ नेत्यांना प्राधान्य देतात. यामुळे मी पक्ष सोडत आहे. काँग्रेसने माझ्या मेहनतीची दखल घेतली नाही, असे रुपज्योती यांनी म्हटले आहे. काँग्रेसकडे यंदा आसाममध्ये सत्तास्थापनेची संधी होती. मात्र, (एआययूडीएफ) आघाडी करणे ही एक चूक होती, असा दावाही त्यांनी केला.

दुसरीकडे काँग्रेसने पक्षविरोधी कारवायांचा ठपका ठेवत रुपज्योती यांची पक्षातून हकालपट्टी केली आहे. आसाममधील काँग्रेसचे प्रदेशाध्यक्ष रिपून बोरा यांनी सांगितले की, ‘या निर्णयाला काँग्रेस नेतृत्वाने मंजुरी दिली आहे’. जितिन प्रसाद यांच्यानंतर भाजपात प्रवेश करणारे रुपज्योती हे दुसरे नेते आहेत.