Ayodhya Ram Mandir : निमंत्रितांना मिळणार मृदा, मोतीचूर लाडवांचा प्रसाद अन् धार्मिक ग्रंथांची भेट मिळणार

अयोध्या - अयोध्येतील रामलल्लाच्या प्राणप्रतिष्ठा सोहळ्याला उपस्थित राहणाऱ्या निमंत्रितांना या मंदिराचा पाया खोदताना काढण्यात आलेली माती बॉक्समधून भेट म्हणून देण्यात येईल, अशी माहिती ट्रस्टकडून देण्यात आली. या प्राणप्रतिष्ठा सोहळ्याला स्वतः पंतप्रधान मोदी हे उपस्थित राहणार असून त्यांना अयोध्येतील राम मंदिराची पंधरा मीटरची प्रतिमा एका ज्यूट बॅगमधून भेट म्हणून देण्यात येईल.

या सोहळ्याला अकरा हजार विशेष निमंत्रित उपस्थित राहणार असून त्यांना आकर्षक अन् अविस्मरणीय भेटवस्तू देण्यात येतील. या निमंत्रितांना प्रसाद म्हणून शंभर ग्रॅम वजनाचे मोतीचूरचे लाडू देण्यात येतील. शुद्ध तुपापासून या लाडवांची निर्मिती करण्यात आली आहे.

निमंत्रितांना भेट म्हणून दोन बॉक्स देण्यात येतील एकामध्ये प्रसादाचे मोतीचूर लाडू आणि तुळशीचे पान असेल तर दुसऱ्या बॉक्समध्ये माती असेल. शरयू नदीतील पाणी भरलेली एक बाटली देखील त्यांना देण्यात येईल. गीता प्रेस गोरखपूरकडून तयार केलेल्या ग्रंथांची एक प्रतही यावेळी देण्यात येईल.

मॉरिशसमध्ये दोन तासांची सवलत

पोर्ट लुईस - अयोध्येत येत्या २२ जानेवारी रोजी रामलल्लाच्या प्राणप्रतिष्ठेचा सोहळा सुरू असताना हिंदू धर्मीयांना प्रार्थना करता यावी म्हणून मॉरिशस सरकारने सरकारी सेवेमध्ये काम करणाऱ्या कर्मचाऱ्यांसाठी दोन तासांची विशेष सवलत देण्याची घोषणा आज केली. या प्राणप्रतिष्ठा सोहळ्याचे विविध दूरचित्रवाणी वाहिन्यांवरून विशेष प्रसारण देखील करण्यात येईल. स्थानिक प्रमाणवेळेनुसार दुपारी दोन ते चार अशी ही सवलत देण्यात येईल.