Wayanad : वायनाडच्या खासदारकीवरून भाजप-काँग्रेसमध्ये जुंपली! रॉबर्ट वद्रा यांनाही उमेदवारी देण्याचा दिला खोचक सल्ला

तिरुअनंतपुरम : काँग्रेसने वायनाडमधील लोकांचा फसवणूक केली आहे, अशी टीका केरळमधील भाजपच्या नेत्यांकडून करण्यात येत आहे. राहुल गांधी यांनी रायबरेली लोकसभा मतदारसंघाची खासदारकी स्वतःकडे ठेवायचा निर्णय घेत केरळमधील वायनाड येथील खासदारकीचा राजीनामा देण्याचा निर्णय घेतला असून, तेथील पोट निवडणुकीमध्ये प्रियांका गांधी-वद्रा यांना काँग्रेसच्या वतीने उमेदवारी देण्यात आल्याने भाजपने काँग्रेसवर टीका केली आहे. काँग्रेसने आता पलक्कड येथील विधानसभेच्या पोटनिवडणुकीमध्ये रॉबर्ट वद्रा यांनाही काँग्रेसने उमेदवारी द्यावी असा खोचक सल्ला भाजप नेत्यांनी दिला आहे.

भाजपचे केरळचे प्रदेशाध्यक्ष के. सुरेंद्रन म्हणाले, ‘‘गांधी-नेहरू घराण्याचे हित जोपासण्यासाठी, काँग्रेस पक्ष हा केवळ एक साधन आहे, हे पुन्हा एकदा सिद्ध झाले आहे.’’ आज वायनाडची खासदारकी सोडणारे राहुल गांधी हे निवडणूक प्रचारामध्ये वायनाड हे माझे घर आहे, असा प्रचार करत होते, आता मात्र त्यांनी या कुटुंबाबद्दल त्यांना काय वाटते हे चांगले दाखवून दिले आहे, असे सुरेंद्रन म्हणाले. तर, ‘‘वायनाडमधील नागरिकांनी राहुल गांधींच्या या कृतीबद्दल काँग्रेसला मतदान यंत्रातून चांगली अद्दल घडवावी असे आवाहन, भाजपचे ज्येष्ठ नेते व्ही. मुरलीधरन यांनी ‘एक्सच्या’ माध्यमातून केले आहे.

काँग्रेसकडून प्रत्युत्तर

काँग्रेसचे नेते व्ही.डी. सतीशन यांनी मात्र भाजपकडून होणारी टीका अनाठायी असून केवळ वायनाडच नव्हे तर सर्व केरळ राज्य प्रियांका यांचे स्वागत करेल, असा दावा केला आहे. ‘‘केरळमधील सत्ताधारी ‘युडीएफ’आघाडी आणि काँग्रेसच्या नेत्यांनी या निर्णयाचे आनंदाने स्वागत केले आहे. उत्तर भारतातील राजकीय परिस्थितीच्या पार्श्‍वभूमीवर राहुल यांनी वायनाड आणि रायबरेली यापैकी रायबरेलीची निवड केली आहे,’’ असे सतीशन म्हणाले. इतकेच नव्हे तर राहुल गांधी यांच्यापेक्षा प्रियांका या अधिक मताधिक्याने निवडून येथील असा दावाही सतीशन यांनी केला.