BJP wins Arunachal Pradesh: लोकसभा निकालापूर्वी भाजपला अच्छे दिन! अरुणाचलमध्ये मिळाली एकहाती सत्ता

नवी दिल्ली- अरुणाचल प्रदेश विधानसभा निवडणुकीमध्ये भाजपने विजय मिळवला आहे. ६० जागा असलेल्या या राज्यात भाजपने आतापर्यंत ३८ जागा जिंकल्या आहेत. त्यामुळे भाजपने बहुमत गाठल्याचं स्पष्ट आहे. याशिवाय ७ जागांवर भाजप आघाडीवर आहे. त्यामुळे भाजप चीनला लागून असलेल्या राज्यात मोठ्या विजयाच्या दिशेने वाटचाल करत असल्याचं दिसत आहे.

अरुणाचल प्रदेशमध्ये भाजप पुन्हा एकदा सत्ता कायम राखण्यात यशस्वी झाली आहे. याशिवाय भाजपचा दणदणीत विजय झालाय असंच म्हणावं लागेल. सध्याच्या निकालानुसार भाजपने ३८ जागा जिंकल्या आहेत, तर ७ जागांवर भाजप आघाडीवर आहे. दुसरीकडे सिक्किममध्ये एसकेएम पक्षाने मोठा विजय मिळवला आहे.

अरुणाचल प्रदेशमध्ये भाजपचे १० उमेदवार निवडणुकीपूर्वीच बिनविरोध निवडून आले होते. त्यामुळे याठिकाणची लढत भाजपसाठी सोपी होती. प्रदेशमध्ये ५० जागांसाठी मतमोजणी सुरु होती. भाजपचे ३८ उमेदवार विजयी घोषित करण्यात आले आहेत. सात जणांनी आघाडी घेतली आहे. अरुणाचल प्रदेशचे मुख्यमंत्री पेमा खांडू यांनी विजयाबाबत सर्वांचे अभिनंदन केले आहे.

नॅशनल पीपल्स पार्टीने (NPEP) दोन जागा जिंकल्या आहेत, कर तीन जागांवर त्यांचे उमेदवार आघाडीवर आहेत. राष्ट्रवादी काँग्रेस पार्टी (NCP) तीन जागांवर आघाडीवर आहे. पीपल्स पार्टी अरुणाचल प्रदेशने (PPA) दोन जागा जिंकल्या आहेत. याशिवाय अपक्ष उमेदवार वांग्लम सविन यांनी खोनसा येथून विजय मिळवलाय. तसेच दोन अपक्ष उमेदवार आघाडीवर आहेत.