Manish Sisodia News : जामिनासाठी मनीष शिसोदियांची सर्वोच्च न्यायालयात धाव; याचिकेवर उद्या होणार सुनावणी

नवी दिल्ली : दिल्ली उच्च न्यायालयाने जामीन देण्यास दुसऱ्यांदा नकार दिल्याच्या पार्श्वभूमीवर आम आदमी पक्षाचे नेते मनीष सिसोदिया यांनी सर्वोच्च न्यायालयात धाव घेतली आहे. त्यांच्या या याचिकेवर मंगळवारी सुनावणी होईल. मद्य धोरण गैरव्यवहार प्रकरणी ईडी आणि सीबीआयकडून सिसोदिया यांच्याविरोधात गुन्हे दाखल करण्यात आलेले आहेत.

सिसोदिया यांना गेल्या आठवड्यात जामीन देण्यास उच्च न्यायालयाने नकार दिला होता. ईडी आणि सीबीआयकडून दाखल असलेल्या प्रकरणांमध्ये जामीन दिला जावा, अशी विनंती सिसोदिया यांनी सर्वोच्च न्यायालयात केली आहे. न्यायमूर्ती अरविंद कुमार आणि न्यायमूर्ती संदीप मेहता यांच्या खंडपीठासमोर सदर याचिकेची सुनावणी होईल.

गतवर्षीच्या फेब्रुवारी महिन्यात सीबीआयने सिसोदिया यांना अटक केली होती. त्याच्या दुसऱ्याच महिन्यात ईडीकडून त्यांना अटक झाली होती. मागील सव्वा वर्षात शिसोदिया यांनी वारंवार जामिनासाठी अर्ज दाखल करुनही त्यांना दिलासा मिळालेला नाही.