Parliament Security Breach : संसदेची सुरक्षा भेदणाऱ्या सहा आरोपींविरोधात एक हजार पानांचे दोषारोपपत्र दाखल   

नवी दिल्ली : गतवर्षीच्या डिसेंबर ​महिन्यात संसदेची सुरक्षा भेदणाऱ्या सहा आरोपींविरोधात दिल्ली पोलिसांच्या विशेष शाखेने पटियाला हाउस न्यायालयात दोषारोपपत्र दाखल केले आहे. डी. मनोरंजन, ललित झा, अमोल शिंदे, महेश कुमावत, सागर शर्मा आणि नीलम आझाद अशी या आरोपींची नावे आहेत.

13 डिसेंबर 2023 रोजी रोजी डी. मनोरंजन आणि सागर शर्मा यांनी प्रेक्षागृहातून लोकसभेत उडी मारत रंगीत धुराचे फवारे सोडले होते तर अमोल शिंदे आणि नीलम आझाद यांनी संसदेच्या बाहेर परिवहन भवनसमोर घोषणाबाजी केली होती. या दोघांना मदत करणाऱ्या महेश कुमावत आणि ललित झा यांना नंतर पोलिसांनी अटक केली होती. वरील आरोपींविरोधात भारतीय दंड संहितेचे कलम 186 तसेच गैरकृत्य प्रतिबंधक कायद्यातील विविध कलमांनुसार गुन्हे दाखल करण्यात आले होते. आरोपींविरोधात दाखल करण्यात आलेले दोषारोपपत्र एक हजार पानांचे आहे.

अतिरिक्त सत्र न्यायमूर्ती हरदीप कौर यांनी दोषारोप पत्राची दखल घेत पुढील सुनावणी 15 जुलै रोजी घेतली जाईल, असे सांगितले. कोठडीची मुदत संपत असल्याच्या पार्श्वभूमीवर आरोपींना न्यायालयात हजर करण्यात आले होते. न्यायालयाने सर्व आरोपींची कोठडी पुढील सुनावणीपर्यंत वाढवली आहे.