सबस्क्राईब करा
नवी दिल्ली : जम्मू काश्मीरचे माजी राज्यपाल सत्यपाल मलिक यांच्या अटकेच्या बातम्यांवरून आज चांगलाच गोंधळ उडाला. मलिक यांच्यासमवेत होणाऱ्या खाप नेत्यांच्या बैठकीला नाकारलेली परवानगी आणि या बैठकीसाठी एकत्र आलेल्या जमावाला पांगविण्यासाठी दिल्ली पोलिसांनी केलेली कारवाई, यामुळे अफवांचे पेव फुटल्यानंतर मलिक यांना ताब्यात घेतल्याचा अथवा अटक झाली नसल्याचा खुलासा दिल्ली पोलिसांना करावा लागला.
पुलवामा दहशतवादी हल्ला निष्काळजीपणे झाला असून पंतप्रधान नरेंद्र मोदींनी आपल्याला मौन राहण्यास सांगितले होते, अशी पंतप्रधानांना लक्ष्य करणारी खळबळजनक मुलाखत दिल्यानंतर माजी राज्यपाल सत्यपाल मलिक गेल्या काही दिवसांपासून चर्चेत आहेत.
तर, काश्मीरमधील प्रकल्पांच्या परवानगीप्रकरणी ३०० कोटी रुपयांची लाच देऊ केल्याच्या मलिक यांच्या आरोपांनंतर सीबीआयद्वारे तपास सुरू असून पुढील आठवड्यात सीबीआय त्यांची चौकशी करणार असल्याच्याही बातम्या झळकल्या आहेत.
यावरून राजकीय आरोप प्रत्यारोपही झडले असून सत्यपाल मलिक यांनी केंद्र सरकारविरुद्ध संघर्षाची घोषणाही केली आहे. या पार्श्वभूमीवर आज सत्यपाल मलिक यांच्या भेटीसाठी पंजाब, हरियाना, पश्चिम उत्तर प्रदेशातील शेतकरी नेते दिल्लीच्या आर. के. पुरम भागामध्ये आले होते. ही खाप नेत्यांची बैठक असल्याचेही सांगण्यात आले.
या बैठकीसाठी मंडप उभारण्यात आला होता आणि जमा होणाऱ्या नेते, समर्थकांसाठी भोजनाचीही व्यवस्था करण्यात येत होती. मात्र, या भागामध्ये निदर्शने, मेळावा यासाठी परवानगी घेण्यात आली नसल्याचे कारण देत दिल्ली पोलिसांनी घटनास्थळी जाऊन जमाव पांगविण्याचा प्रयत्न केला. याला विरोध करणाऱ्या काही जणांना पोलिसांनी ताब्यातही घेतले.
या कारवाईमुळे नाराज झालेले माजी राज्यपाल सत्यपाल मलिक यांनी आर. के. पूरम पोलिस ठाण्यात जाऊन विरोध व्यक्त केला. त्यामुळे मलिक यांना अटक झाल्याच्या बातम्या माध्यमांमध्ये झाल्या होत्या. वातावरण तापल्याने पोलिस ठाण्याबाहेर मोठ्या प्रमाणात बंदोबस्त तैनात केला. एवढेच नव्हे तर सत्यपाल मलिक यांना अटकही झालेली नाही आणि ताब्यातही घेतलेले नाही.
मलिक स्वतः पोलिस ठाण्यात आले, असे पोलिस उपायुक्तांनी (नैर्ऋत्य दिल्ली) स्पष्ट केले. आर. के. पुरम सेक्टर ९ या भागातील उद्यानामध्ये निदर्शने, मेळाव्याची परवानगी नसताना काही जण तेथे बैठकीसाठी एकत्र आले होते. या समुहाच्या बैठकीला परवानगी नाकारल्याचे पोलिसांचे म्हणणे होते. दुपारी उशिरा सत्यपाल मलिक समर्थकांसह घरी परत गेल्याचेही पोलिसांतर्फे सांगण्यात आले.
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.