Dr.Tara Bhawalkar : मराठी भाषा संतांनी टिकवली : भवाळकर

नवी दिल्ली : ‘‘महाराष्ट्राला सातत्याने पांडुरंगाचे स्मरण करायला लावणारी मराठी भाषा संतांनी टिकवली. भाषा ही जैविक गोष्ट आहे. ती बोलल्यानेच जिवंत राहते. नुसती पुस्तके आणि ग्रंथांतून जिवंत राहात नाही..ज्या दिवशी आईने आपल्या बाळाला पहिली ओवी म्हटली असेल त्या दिवशी मराठी भाषा जन्माला आली,’’ अशा शब्दांत दिल्लीतील ९८ व्या अ.भा. मराठी साहित्य संमेलनाच्या उद्घाटन सोहळ्यात अध्यक्ष डॉ. तारा भवाळकर यांनी मराठी भाषेचा जन्म उलगडून सांगितला. ‘‘उच्चवर्णीय एकनाथ महाराज आणि सर्वांचे शिरोमणी ज्ञानेश्वर महाराजांपर्यंत सर्वांनी मराठीची स्तुती केली आहे..अभिजात मराठीची पायाभरणी करणारी ही मंडळी आहे. संतांनी शिवाजी महाराजांसाठी भूमी निर्माण केली, असे विश्लेषण न्या. महादेव गोविंद रानडे यांनी केले आहे,’’ असे डॉ. भवाळकर म्हणाल्या. दोन कमी शंभराव्या साहित्य संमेलनाच्या निमित्ताने आपण जमलेलो आहोत, मराठी ही लोकभाषा आणि ९८ व्या साहित्य संमेलनाच्या निमित्ताने जमलो ती अभिजात भाषा आहे, अशी सुरुवात करीत डॉ. भवाळकर यांनी लोकभाषा आणि अभिजात भाषेतील फरक नमूद केला..आपण मंडळी या निरनिराळ्या बोलींमधून बोलत आलो आहोत आणि या सगळ्यांचा परिपाक म्हणजे हे संमेलन आहे. या संमेलनात महाराष्ट्राचा कानाकोपरा जमला आहे. पंतप्रधान मोदी यांचे स्वागत करताना भेट दिलेली विठ्ठल-रुखमाईची मूर्ती हे आमच्या महाराष्ट्राचे आराध्य दैवत आणि आमच्या उदार संस्कृतीचे प्रतीक आहे. हा विठ्ठल कर्नाटकातून आला, महाराष्ट्रात स्थिर झाला. आजही वारीसाठी येणारी मंडळी केवळ मराठी नव्हे तर कर्नाटक आणि तेलंगणमधीलही आहेत असे भवाळकर म्हणाल्या..हा विठ्ठल मराठी माणसासारखा साधा, कष्टकरी आहे. गोऱ्या रंगाची त्याला हौस नाही. तो काळासावळा आहे. महाराष्ट्राला जो रंग आहे, त्या रंगाचाही अभिमान आहे. असा हा सर्वांना सामावून घेणारा विठ्ठल आहे. त्याचे भक्त सर्व जाती-जमातींचे आहेत. ही सर्व मंडळी पदराखाली, सावलीखाली घेणाऱ्या विठूरायाची परमभक्त आहे..ते कुठे शिकले नाहीत. तरीही ते मराठीमध्ये काव्य करीत होते याचा अर्थ मराठी फक्त लिखित नाही तर बोलीतून पसरलेली आहे. म्हणूनच शिवाजी महाराजांना खेड्यापाड्यातले मावळे मिळाले. त्यांच्यामुळेच संस्कृतीचे बलस्थान ठरलेली मराठी भाषा जिवंत राहिली. मराठी भाषेला सर्व संतांनी मिळून अभिजात दर्जा मिळवून दिला आहे. भाषा ही आपलेपण निर्माण करणारी, जोडणारी असावी, तोडणारी नव्हे, असे प्रतिपादन डॉ. भवाळकर यांनी केले..PM Narendra Modi : मराठीत शक्ती, भक्ती, युक्तीही; दिल्लीत सारस्वतांच्या मेळ्यात पंतप्रधान नरेंद्र मोदींचे गौरवोद्गार.भाषांची हजरजबाबी देवघेवपंतप्रधान नरेंद्र मोदी हे डॉ. भवाळकर यांचे भाषण लक्षपूर्वक ऐकत होते. त्यांचे भाषण पूर्ण झाल्यानंतर पंतप्रधानांना डॉ. भवाळकरांना ‘फार छान’ अशी दाद दिली. त्यावर ‘बडे पर गुजराती आवडे छे’ असे डॉ. भवाळकर मिश्कीलपणे उत्तरल्या..सकाळ+ चे सदस्य व्हा ब्रेक घ्या, डोकं चालवा, कोडे सोडवा!शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.

Dr.Tara Bhawalkar : मराठी भाषा संतांनी टिकवली : भवाळकर

Related Stories