हवाला मार्गे कोलकाताहून I-PAC च्या गोवा कार्यालयात पोहोचले 20 कोटी, ईडीचा खळबळजनक दावा!

ईडीने कोलकाता उच्च न्यायालयात दाखल केलेल्या याचिकेत एक धक्कादायक खुलासा केला आहे. त्यानुसार, पश्चिम बंगालमध्ये झालेल्या कथित कोळसा तस्करी प्रकरणातून मिळालेल्या सुमारे २० कोटी रुपयांची रक्कम एका गुंतागुंतीच्या हवाला जाळ्याद्वारे कोलकाताहून गोव्यापर्यंत पोहोचवण्यात आली. ही रक्कम इंडियन पॉलिटिकल अॅक्शन कमिटी (I-PAC) या राजकीय सल्लागार कंपनीच्या गोवा कार्यालयात हस्तांतरित झाली. २०२१-२२ मधील गोवा विधानसभा निवडणुकीदरम्यान या पैशांचा वापर राजकीय मोहिमा आणि कार्यक्रमांच्या व्यवस्थापनासाठी करण्यात आला असल्याचे ईडीचे म्हणणे आहे. मात्र, हे आरोप अद्याप न्यायालयात सिद्ध झालेले नाहीत आणि त्यांची चौकशी सुरू आहे.