Potato price fall : बटाट्याच्या घसरलेल्या दराने शेतकरी बेहाल; पुढील हंगामातही...

रोजच्या जेवणाच्या ताटीताल सर्वच पदार्थ महाग होत असताना बटाट्याने सर्वसामान्यांना दिलासा दिला आहे. मात्र बटाटा उत्पादक शेतकरी बेहाल झाले आहेत. बटाटा उत्पादक शेतकऱ्यांसाठी यंदाचे साल नुकसान करणारे ठरले आहे. शेतकऱ्यांचा उत्पादन खर्चही निघणं कठीण झालं आहे.

सध्या कोल्डस्टोरेजमध्ये मोठ्या प्रमाणात बटाटा साठवण्यात आलेला आहे. त्यामुळे आगामी काळात देखील बटाट्याचे दर वाढण्याची शक्यता नाही. एवढा साठा आहे की, या हंगामात बटाटा संपविणे फार कठीण आहे.

बटाट्याचे सर्वात मोठे उत्पादक असलेल्या उत्तर प्रदेशातील आग्रा मंडईत सध्या बटाटे ८०० ते ११०० रुपये प्रतिक्विंटल दराने विकले जात आहेत. कोल्ड स्टोअरमध्ये भरताना प्रतिक्विंटल ५०० ते ८०० रुपये दर होता. साठवणुकीचा एकूण खर्च २८० ते ३०० रुपये प्रतिक्विंटल आहे. त्यात शीतगृहाचे भाडे व इतर खर्चाचा समावेश आहे. सध्या उपलब्ध असलेला घाऊक भाव हा शेतकऱ्यांच्या एकूण खर्चाएवढा असल्याने शेतकऱ्यांचे मोठे नुकसान होत आहे.

उत्तर प्रदेशातील बटाटा उत्पादक बटुक नारायण मिश्रा यांनी सांगितले की, साठवणुकीदरम्यान काही बटाटे खराब होतात. शिवाय वजनही कमी होते. या अर्थाने नुकसान होत आहे. गेल्या वर्षी बटाटा उत्पादक शेतकऱ्यांना १५०० रुपये प्रतिक्विंटल दर मिळाला होता, मात्र सध्या कमाल दर ११०० रुपये प्रतिक्विंटल आहे. म्हणजेच गेल्या वर्षीच्या तुलनेत शेतकऱ्यांना प्रतिक्विंटल ४०० रुपये कमी दर मिळत आहे.

पंजाबमधील बटाटा उत्पादक शेतकरी आणि कॉन्फेडरेशन ऑफ बटाटा सीड फार्मर्सचे सरचिटणीस जंगबहादूर सिंग म्हणाले की, यंदा बटाटा उत्पादक शेतकऱ्यांना फायदा झाला नाही. त्यामुळे पुढील काळात बटाट्याची लागवड कमी होऊ शकते.

देशात यंदा बटाट्याचे प्रचंड उत्पादन झाले आहे. २०२१-२२ मध्ये सुमारे ५३६ लाख टन बटाट्याचे उत्पादन झाले. २०२२-२३ मध्ये ती वाढून ५९० लाख टन होण्याचा अंदाज आहे. फेडरेशन ऑफ कोल्ड स्टोरेज असोसिएशन ऑफ इंडियाचे अध्यक्ष राजेश गोयल यांनी सांगितले की, यंदा ९० ते ९५ टक्के शीतगृहे भरली आहेत. गेल्या वर्षी केवळ ८५ टक्के भरले होते.