तुम्ही 'चौकीदार', तर मी 'बेरोजगार' : हार्दिक पटेल

अहमदाबाद : पंतप्रधान नरेंद्र मोदी यांनी सुरू केलेल्या 'मैं भी चौकीदार' या मोहिमेनंतर पाटीदार नेते व काँग्रेसचे लोकसभेचे उमेदवार हार्दिक पटेल यांनीही ट्विटरवर अकाऊंटवर आपल्या नावापुढे 'बेरोजगार' असे लावले आहे. त्यामुळे आता त्यांचे नाव 'बेरोजगार हार्दिक पटेल' असे दिसत आहे.

मोदींनी आपल्या नावापुढे चौकीदार लावल्यानंतर भाजपतील सर्व मोठ्या नेत्यांनी व मंत्र्यांनी आपल्या नावापुढे चौकीदार लावले आहे. 'तुमचा चौकीदार खंबीरपणे उभा आहे व देशाची सेवा करत आहे. पण मी एकटा नाही. जो भ्रष्टाचाराविरुद्ध लढतो, अस्वच्छतेविरूद्ध लढतो, समाजातील दुष्ट शक्तींविरोधात आवाज उठवतो तो प्रत्येकजण चौकीदार आहे. देशाच्या सर्वांगीण विकासासाठी जो झटतो आहे तो चौकीदार आहे. आज प्रत्येक भारतीय म्हणतोय - #MainBhiChowkidar' असे ट्विट केले होते. यालाच उत्तर देत पटेल यांनी नवीन 'बेरोजगार' मोहिम सुरू केली आहे. 

भाजप सत्तेत आल्यापासून बेरोजगारी वाढली आहे. अनेक शिक्षित तरूण केवळ नोकरी नसल्यामुळे बेरोजगार आहे. त्यामुळे हार्दिक पटेल यांनी 'बेरोजगार' असे नाव लावून पुन्हा एकदा मोदी सरकारवर टीका केली आहे.