Cyclone Biparjoy: बिपरजॉय चक्रीवादळापूर्वी गुजरातमध्ये मुसळधार पाऊसाची हजेरी, 30 हजार लोकांना हलवलं सुरक्षित स्थळी

बिपरजॉय चक्रीवादळ तीव्र झाले असून ते गुजारतकडे सरकत आहे. याच पार्श्वभूमीवर गुजरातमध्ये हाय अलर्ट जारी करण्यात आलाय. अरबी समुद्रातून येणारे हे वादळ गुजरातमध्ये धडकण्याची शक्यता वर्तवण्यात आली आहे. हे वादळ खूप भीषण स्वरूपाचे असल्याचा इशारा हवामान खात्याने दिला आहे.

दरम्यान, बिपरजॉय चक्रीवादळापूर्वी गुजरातमध्ये मुसळधार पावसाला सुरुवात झाली असून आत्तापर्यंत 30 हजार लोकांना सुरक्षित स्थळी हलवण्यात आलं आहे. उद्या 15 जून रोजी बिपरजॉय चक्रीवादळ आणखी तीव्र होण्याची शक्यता हवामान विभागाकडून वर्तवण्यात आली आहे. गुजरात सरकारही सतर्क झाले असून योग्य ती खबरदारी घेण्यात आली आहे.

केंद्रीय गृहमंत्री अमित शाहा यांनी काल मंगळवारी चक्रीवादळाच्या तयारीची आढावा बैठक घेतली. केंद्र सरकार आणि राज्यांनी मिळून गेल्या 9 वर्षामध्ये अनेक आपत्तींना तोंड दिले आहे. या नवीन आपत्तीला तोंड देण्यासाठी सरकार पूर्णपणे तयार असल्याचं अमित शाह यांनी म्हंटलं आहे. 'बिपरजॉय' चक्रीवादळामुळे होणारे संभाव्य नुकसान कमी करणे हे आमचे उद्दिष्ट असल्याचे शाह म्हणाले आहेत.

गुजरातचे मुख्यमंत्री भूपेंद्र पटेल यांनी लोकांना वेळोवेळी दिलेल्या सूचनांचे पालन करण्याचे आवाहन केलं आहे. तर 30 हजार लोकांना सुरक्षित स्थळी हलवण्यात आल्याची माहिती दिली आहे. बिपरजॉय चक्रीवादळामुळे गुजरातमध्ये पावसाला सुरुवात झाली.