द्वेषाच्या वणव्यातही माणुसकीचे दर्शन; हिंदू-मुस्लिमांकडून होतंय गौरवास्पद काम

नवी दिल्ली : देशाची राजधानी द्वेषाच्या वणव्यात जळत असताना अनेक भागांमध्ये माणुसकीचे दर्शन घडले. अनेक दंगलग्रस्त भागांमध्ये हिंदूंनीच मुस्लिमांना आश्रय दिल्याने त्यांचे प्राण वाचले. ईशान्य दिल्लीतील अशोकनगर भागामध्ये चाळीस मुस्लिम नागरिकांना याचा प्रत्यय आला. माथेफिरू जमावाने अनेक मुस्लिमांची घरे आणि दुकाने पेटवून दिल्यानंतर त्यांच्याच शेजारी राहणाऱ्या हिंदूंनी त्यांना आश्रय दिला होता.

ताज्या बातम्यांसाठी डाऊनलोड करा ई-सकाळचे ऍप

येथे बडी मशीदला लागून असलेल्या परिसरामध्ये घुसलेल्या एक हजाराच्या जमावाने प्रार्थनास्थळाची नासधूस केली. जमावाने या वेळी घोषणाबाजी करायला सुरवात केल्याने आम्ही जीव वाचविण्यासाठी पळ काढल्याचे स्थानिक खुर्शीर आलम यांनी सांगितले. या परिसरातील प्रत्येक घर आणि दुकानाची दंगेखोरांनी नासधूस केली. स्थानिकांनी त्यांना हे थांबविण्याची विनंती केली, पण त्यांनी कुणालाच जुमानले नाही. हल्लेखोरांनी चेहरे कपड्याने झाकले होते, ते घोषणाबाजी देत होते, असे अशोकनगरमधील राजेश खत्री यांनी स्पष्ट केले. दंगेखोरांनी दुकानांची जाळपोळ केल्यानंतर या भागामध्ये मोठ्या प्रमाणावर लुटालूटदेखील केली. या भागामध्ये जाणीवपूर्वक अल्पसंख्याकांना लक्ष करण्यात आले. आता आमचे घरही गेले आणि जी काही पुंजी बांधून ठेवली होती तीदेखील गेल्याची खंत मोहंमद रशीद यांनी व्यक्त केली.

सरकारने जबाबदारी सुनिश्चित करावी; आरएसएसचा केंद्र सरकारवर निषाणा

चाँदपीर बाबांच्या दर्ग्याची नासधूस
चाँदबाग परिसरामध्ये मुस्लिम आणि हिंदूंनी एकत्र येऊन परस्परांच्या धार्मिक स्थळांचे संरक्षण केल्याचे चित्रही यानिमित्ताने पहायला मिळाले. विजय पार्क आणि यमुना विहार या दोन्ही भागांमध्ये दंगेखोरांना रोखण्याचे काम दोन्ही समुदायांच्या लोकांनी केले. ईशान्य दिल्लीतील अशोकनगर भागामध्ये मशीद आणि दर्ग्याची नासधूस करण्यात आल्याची बाब उघड झाली आहे. याच भागामध्ये चाँदपीर बाबा यांचा दर्गा आहे. या दर्ग्याला मुस्लिमांप्रमाणेच हिंदूदेखील मोठ्या संख्येने भेट देत असतात. या दर्ग्याची नासधूस करणाऱ्यांना येथील परंपरा माहितीच नाही, अशी खंत आज स्थानिकांनी बोलून दाखविली. भजनपुरा भागामध्येही दोन गाड्यांमधून आलेल्या दंगेखोरांनी वाहनांची मोडतोड करत दुकानांना आगी लावल्या. आता या भागातील स्थानिकांना वीज, वैद्यकीय सेवा आदींसारख्या जीवनावश्‍यक सेवांपासून वंचित राहावे लागत आहे.

ऐक्याचे व्हिडिओ व्हायरल
या हिंसाचाराच्या पार्श्वभूमीवर धार्मिक ऐक्य आणि सद्भावनेची प्रचिती देणारे काही व्हिडिओ समाजमाध्यमांत व्हायरल झाले आहेत. अशोकनगर भागामध्ये दंगेखोरांनी मशिदीची नासधूस करत पवित्र धर्मग्रंथांची नासधूस केली होती. आज मुस्लिमांप्रमाणेच हिंदूंनीदेखील या धर्मग्रंथांची रस्त्यांवर पडलेली पाने एकत्र करत सामाजिक ऐक्याचा वस्तूपाठ घालून दिला. शास्त्री पार्क परिसरामध्ये हिंदू आणि मुस्लिमांनीच एकता रॅली काढल्याचा व्हिडिओ व्हायरल झाला आहे.