India GDP : भारताच्या अर्थव्यवस्थेची मोठी झेप! पहिल्यांदाच 4 ट्रिलियन डॉलर्सवर पोहोचला जीडीपी - रिपोर्ट

India GDP Crosses 4 trillion dollar mark : भारत देशाच्या अर्थव्यवस्थेने मोठी झेप घेतली आहे. देशाचा GDP हा पहिल्यांदाच 4 ट्रिलियन डॉलर्सच्या पुढे गेला आहे. यामुळे भारत देश आता 333 लाख कोटी रुपयांची अर्थव्यवस्था झाला आहे. एशियानेट वृत्तसंस्थेने याबाबतचं वृत्त प्रसिद्ध केलं आहे.

भारताची अर्थव्यवस्था अगदी वेगाने पुढे जात असल्याचा हा पुरावा आहे. यापूर्वी मोदी सरकारने भारत 2024-25 या वर्षापर्यंत 4 ट्रिलियन डॉलर्सचा पल्ला गाठेल असा विश्वास व्यक्त केला होता. मात्र, आता 2024 हे वर्ष सुरू होण्यापूर्वीच भारतीय अर्थव्यवस्थेने हा टप्पा गाठला आहे.

सध्या ग्लोबल जीडीपीच्या यादीमध्ये अमेरिका पहिल्या क्रमांकावर आहे. त्यापाठोपाठ चीन, जपान आणि जर्मनीचा क्रमांक लागतो. भारताने या यादीमध्ये पाचव्या क्रमांकावर झेप घेत, युनायटेड किंगडमला मागे टाकलं आहे. विकासाची गती पाहता, पुढील तीन वर्षांमध्ये भारत जर्मनी आणि जपानलाही मागे टाकून जगातील तिसऱ्या क्रमांकाची अर्थव्यवस्था होऊ शकतो; असा अंदाज तज्ज्ञांनी वर्तवला आहे.