Supreme Court : खासदारकी रद्द झालेले फैजल सर्वोच्च न्यायालयात; हायकोर्टाने यापूर्वीच...

नवी दिल्ली : लक्षद्वीपचे राष्ट्रवादी काँग्रेसचे खासदार मोहम्मद फैजल यांनी सर्वोच्च न्यायालयात याचिका दाखल केली आहे. याचिकेत त्यांचे लोकसभा सदस्यत्व बहाल करण्याची मागणी करण्यात आली आहे.

फैजल यांना खुनाच्या प्रयत्न प्रकरणात 10 वर्षांची शिक्षा झाली होती, त्यामुळे त्यांना अपात्र ठरवण्यात आले होते. 25 जानेवारी रोजी केरळ उच्च न्यायालयाने १० वर्षांच्या शिक्षेला स्थगिती दिली. परंतु लोकसभा सचिवालयाने अपात्रतेचा आदेश मागे घेतलेला नाही.

यापूर्वी 30 जानेवारी 2023 रोजी खासदार मोहम्मद फैजलच्या हत्येच्या प्रयत्नाच्या शिक्षेला केरळ उच्च न्यायालयाने दिलेल्या स्थगितीला लक्षद्वीप या केंद्रशासित प्रदेशाने सर्वोच्च न्यायालयात आव्हान दिले. सॉलिसिटर जनरल तुषार मेहता यांनी या प्रकरणाची सुनावणी लवकर व्हावी, असं म्हटलं होत.

दरम्यान सुप्रीम कोर्टाने सांगितले की हे प्रकरण फार तातडीचे नाही, त्यामुळे पुढील आठवड्यात हे प्रकरण सुनावणीसाठी सूचीबद्ध केले जाईल.

लक्षद्वीपचे खासदार मोहम्मद फैजल यांचे सदस्यत्व संपुष्टात आले होते. त्यानंतर लोकसभा सचिवालयाने त्यांची जागा रिक्त घोषित केली होती. हत्येचा प्रयत्न केल्याच्या गुन्ह्यात त्यांना जानेवारीत शिक्षा सुनावण्यात आली होती. यानंतर निवडणूक आयोगाने त्यांच्या जागेवर पोटनिवडणूक घेण्याचे आदेश दिले होते, मात्र त्यानंतर उच्च न्यायालयाने त्यांच्या शिक्षेला स्थगिती दिली होती.