Lok Sabha Election 2024 : मत मोजणीची प्रक्रिया कशी असते? कशी असते दिवसभराची तयारी

Lok Sabha Election 2024 :

लोकसभा निवडणूक जाहीर झाली, प्रचार झाले, मतदान झाले आता फक्त उरलाय तो महत्त्वाचा टप्पा म्हणजे मतमोजणी. कोणाच्या हाती येणार सत्ता अन् कोणाला मिळणार निराशा हे उद्या म्हणजे ४ जून रोजी स्पष्ट होणार आहे.

लोकसभेसाठी देशभरात वेगवेगळ्या टप्प्यांमध्ये मतदान पार पडलं होतं. पण, निकाल मात्र एकाच दिवशी लागणार आहे. त्यामुळे सोशल मिडियावरील नेटकरी, गावातील गावकरी निकालासाठी उत्सुक आहेत.

पण, मतमोजणीची प्रक्रिया कशी असते, EVM मशीन कधी आणले जातात. त्यावर कसे मोजणी केली जाते या याबद्दल अधिक जाणून घेऊयात.

मतमोजणी कशी होते

४ जून रोजी सकाळी 8 वाजता मतमोजणीला सुरुवात होणार असून त्यापूर्वी निवडणूक निर्णय अधिकारी आणि सहाय्यक निवडणूक अधिकारी मतांची गुप्तता राखण्याची शपथ घेतात. मतमोजणी सुरू होण्यापूर्वी सर्व ईव्हीएम मशीन तपासल्या जातील. ही तपासणीही रिटर्निंग ऑफिसरच्या उपस्थितीत होते.

मतमोजणी एजंट किती असतात

प्रत्येक निवडणुकीच्या मतमोजणीवेळी एजंट उपस्थित असतात. प्रतिस्पर्धी उमेदवारांना त्यांच्या मतमोजणी एजंट किंवा निवडणूक एजंटसह मतमोजणी केंद्रावर राहण्याची परवानगी दिली जाते.    

मतमोजणीच्या संपूर्ण प्रक्रियेवर मतमोजणी एजंट देखरेख करतील. सर्व प्रकारच्या मतमोजणीच्या वेळी रिटर्निंग ऑफिसर उपस्थित राहतील. जर मतमोजणीदरम्यान ईव्हीएममध्ये बिघाड झाला किंवा व्हीव्हीपीएटी स्लिपमध्ये काही तफावत आढळली, तर निवडणूक पर्यवेक्षण करणारे रिटर्निंग ऑफिसर तत्काळ निवडणूक आयोगाला कळवतील.

यावर परिस्थितीचे गांभीर्य ओळखून निवडणूक आयोग योग्य तो निर्णय घेतो. या प्रकरणावर निवडणूक आयोगाला कोणतीही मोठी चूक किंवा कमतरता आढळली नाही, तर ती प्रक्रिया सुरू ठेवण्यास सांगितली जाईल. त्यात गंभीर कमतरता किंवा चूक आढळून आल्यास निवडणूक आयोग निवडणूक नाकारेल आणि फेरनिवडणुकीचे आदेश देईल.

कोणत्याही अनियमिततेच्या तक्रारीशिवाय आणि निवडणूक आयोगाच्या कोणत्याही सूचनेशिवाय मतमोजणी संपली, तर मतमोजणी पूर्ण झाल्यानंतर रिटर्निंग ऑफिसर निकाल जाहीर करतील.