Loksabha Election 2024 : या आहेत सहाव्या टप्प्यातील प्रमुख लढती

नवी दिल्ली - लोकसभा निवडणुकीच्या सहाव्या टप्प्यातील प्रचार गुरुवारी थांबला. या टप्प्यासाठी २५ मे रोजी आठ राज्य आणि केंद्रशासित प्रदेशातील ५८ जागांवर मतदान होत आहे. यात अनंतनाग-राजौरी मतदारसंघाचा समावेश आहे.

या ठिकाणी तिसऱ्या टप्प्यात मतदान होणार होते, मात्र ते सहाव्या टप्प्यापर्यंत पुढे ढकलले. माजी केंद्रीय मंत्री मेनका गांधी, भोजपुरी कलाकार मनोज तिवारी, माजी मुख्यमंत्री मेहबुबा मुफ्ती, मनोहरलाल खट्टर यांच्यासह अनेक मंत्र्यांचे भवितव्य या टप्प्यात मतदान यंत्रात बंद होणार आहे.

उत्तर प्रदेशातील चौदा, हरियानातील सर्व दहा, बिहार आणि पश्‍चिम बंगालमधील प्रत्येकी आठ, दिल्लीतील सर्व सात, ओडिशाचे सहा आणि झारखंडच्या चार जागांचा समावेश आहे. २०१९ मध्ये ५८ पैकी ४० जागा भाजपने जिंकल्या. तर दुसऱ्या स्थानावर असणाऱ्या बसपकडे चार जागा गेल्या. कॉँग्रेसला एकही जागा मिळाली नव्हती. मागच्या वेळी ५८ जागांवर ६४.२२ टक्के मतदान झाले होते.