Basavaraj Bommai : लोकसभा निवडणुकीत भाजप दक्षिणेतही जास्त जागा जिंकणार

बंगळूर - ‘लोकसभा निवडणुकीत कर्नाटकात भाजप २५ पेक्षा जास्त जागा जिंकू. तसेच दक्षिण भारतातही जास्त जागा जिंकू’ असा विश्‍वास कर्नाटकचे माजी मुख्यमंत्री बसवराज बोम्मई यांनी व्यक्त केला. काँग्रेसचे अध्यक्ष मल्लिकार्जुन खर्गे यांचे निकटवर्तीय निवृत्त केएएस अधिकारी रुद्रय्या यांनी बुधवारी काँग्रेस पक्षाला सोडचिठ्ठी देत भाजपमध्ये प्रवेश केला. या कार्यक्रमामध्ये बोम्मई बोलत होते.

भाजप कार्यालयात झालेल्या पक्षप्रवेश कार्यक्रमात बोलताना ते म्हणाले, ‘लोकसभा निवडणुकीत भाजप केवळ राज्यातच नव्हे, तर शेजारच्या तमिळनाडू, आंध्र प्रदेश आणि तेलंगणमध्येही अधिक जागा जिंकेल. अनुसूचित जातींचा काँग्रेसकडून भ्रमनिरास झाला आहे. काँग्रेसने या समाजाचे आरक्षण वाढवले ​​नाही. मी मुख्यमंत्री असताना ‘एससी’, ‘एसटी’ आरक्षण वाढवले ​​होते.

‘इंडिया’ आघाडीबाबत भ्रमनिरास

‘विरोधकांची ‘इंडिया’ आघाडी पुढील काळात टिकणार नाही. या आघाडीत काँग्रेस पक्ष वरचढ ठरत असल्याने, इतर पक्ष युतीतून बाहेर पडत आहेत. ममता बॅनर्जी यांनी याआधीच सांगितले आहे की, त्यांचा आघाडीबाबत भ्रमनिरास झाला आहे,’ असे बोम्मई यांनी सांगितले.