नवी दिल्ली - आंतरराष्ट्रीय महिला दिनाच्या पर्वावर आज दिल्लीतील भाजप सरकारने आर्थिकदृष्ट्या दुर्बल वर्गातील महिलांना दरमहा २५०० रुपये देणाऱ्या ‘महिला समृद्धी योजने’च्या अंमलबजावणीची घोषणा केली.
भाजपचे राष्ट्रीय अध्यक्ष आणि केंद्रीय मंत्री जे.पी. नड्डा यांनी दिल्लीच्या मुख्यमंत्री रेखा गुप्ता यांच्या उपस्थितीत या योजनेची जवाहरलाल नेहरू स्टेडियममध्ये आयोजित एका समारंभात ही घोषणा केली.
मुख्यमंत्री रेखा गुप्ता यांच्या अध्यक्षतेखाली झालेल्या बैठकीत आज दिल्ली मंत्रिमंडळाने महिला समृद्धी योजनेला मंजुरी दिली. या योजनेवर ५१०० कोटी रुपये खर्च येणार असून २१ ते ६० वर्षे वयाच्या १७ ते १८ लाख महिलांना दरमहा २५०० रुपये दिले जातील. मात्र, या योजनेसाठी नोंदणीच्या तारखेची घोषणा अद्याप करण्यात आलेली नाही.
या योजनेच्या अंमलबजावणीसाठी मुख्यमंत्री गुप्ता यांच्या अध्यक्षतेखाली एक समिती स्थापन करण्यात आली असून त्यात प्रवेश वर्मा, कपिल मिश्रा आणि आशीष सूद यांचा समावेश आहे. ही समिती या योजनेशी संबंधित अटी आणि शर्ती निश्चित करणार आहे. त्यानंतर लवकरच नाव संकेतस्थळावर नोंदणी सुरु होईल.
येत्या एप्रिल महिन्यापासून या योजनेचा लाभ महिलांना मिळेल, अशी अपेक्षा व्यक्त करण्यात येत आहे. दिल्ली विधानसभा निवडणुकीदरम्यान महिलांना दरमहा २५०० रुपयांचे अर्थसाह्य करण्याचे आश्वासन भाजपने जाहीरनाम्यात दिले होते. दिल्लीच्या जनतेला दिलेल्या सर्व वचनांची पूर्तता केली जाईल, अशी ग्वाही मुख्यमंत्री गुप्ता यांनी दिली.
महिलांच्या नेतृत्वाखालील विकास आमच्या भाजप सरकारच्या केंद्रस्थानी आहे. महिलांची साथ मिळाली नसती तर राजधानी दिल्लीमध्ये भाजप विधानसभा निवडणूक जिंकू शकला नसता. हा विजय महिलांचे आशीर्वाद आणि सहकार्याने मिळाला असल्याची कृतज्ञता जे.पी. नड्डा यांनी व्यक्त केली.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.