ममतांच्या भाच्यावर हात उचलणाऱ्याचा रहस्यमयी मृत्यू

कोलकाता: ममता बॅनर्जींचा (mamta Banerjee) भाचा आणि तृणमुल खासदार अभिषेक बॅनर्जी यांच्या कानाखाली मारणाऱ्या व्यक्तीचा संशयास्पद मृत्यू झाला आहे. देवाशिष आचार्य (Devasish Acharya) असे मृत व्यक्तीचे नाव आहे. गुरुवारी एका अज्ज्ञात व्यक्तीने देवाशिष यांना पश्चिम बंगालमधील रुग्णालयात दाखल केले. रुग्णालयात दाखल केल्यानंतर काही वेळाने देवाशिष यांना मृत घोषित केल. २०१५ साली देवाशिषने अभिषेक बॅनर्जी यांच्या कानशिलात लगावली होती. (Man who slapped mamtas nephew Abhishek Banerjee dies mysteriously family claims murder)

गंभीर अवस्थेत असलेल्या देवाशिष यांना मिदनापोरमधील तामलुक जिल्हा रुग्णालयात उपचारासाठी नेण्यात आले होते. हॉस्पिटल रेकॉर्डनुसार, गुरुवारी पहाटे ४ वाजण्याच्या सुमारास देवाशिषला रुग्णालयात आणले. रुग्णालयात आणून सोडल्यानंतर ती अज्ज्ञात व्यक्ती निघून गेली. दुपारी त्यांचा मृत्यू झाला. कुटुंबीयांना देवाशिष यांच्या रहस्यमयी मृत्यूबद्दल समजल्यानंतर त्यांनी हत्या झाल्याचा आरोप केला आहे.

देवाशिष आचार्य यांचा रहस्यमयी पद्धतीने मृत्यू झाल्याने भाजपाने काही प्रश्न उपस्थित केले आहेत. देवाशिष २०२०मध्ये भाजपात दाखल झाले होते. १६ जूनच्या संध्याकाळी देवाशिष त्यांच्या दोन मित्रांसह बाहेर गेले होते, अशी माहिती प्राथमिक चौकशीतून समोर आलीय. या दरम्यान देवाशिष यांना एक फोन कॉल आला आणि ते मित्रांना चहाच्या टपरीवर सोडून निघून गेले. त्यानंतर काय घडलं, त्याचा शोध पोलीस घेत आहेत.