खुशखबर! SBIचं ग्राहकांना मोठं गिफ्ट; FD वर जादा व्याज देणाऱ्या अमृत कलश योजनेला मुदतवाढ

नवी दिल्लीः देशातील सर्वात मोठी बँक असलेल्या एसबीआयने ग्राहकांना एक खूशखबर दिली आहे. एसबीआयकडे सर्वात जास्त व्याज देणारी एक योजना होती. ती १५ ऑगस्ट रोजी समाप्त होणार होती. परंतु आता बँकेने या एफडी योजनेला मुदतवाढ दिलेली आहे.

एसबीआयच्या जादा व्याजदर देणाऱ्या एफडी स्कीमचं नाव अमृत कलश आहे. या योजनेची तारीख वाढवण्यात आलीय. यासंदर्भात स्टेट बँक ऑफ इंडियाने एक सर्क्युलर जारी केलं आहे. त्यामध्ये या योजनेची तारीख ३१ डिसेंबर २०२३ करण्यात आलीय. योजनेची शेवटची तारीख १५ ऑगस्ट २०२३ होती.

एसबीआयने अमृत कलश योजना १२ एप्रिल २०२३ रोजी लाँच केली होती. बँकेची ही एक विशेष योजना आहे. एनआरआय ग्राहकसुद्धा या योजनेमध्ये गुंतवणूक करु शकत आहेत. अमृत कलश योजेनेमध्ये ग्राहक २ कोटींपेक्षा कमी रक्कम ४०० दिवसांसाठी ठेवू शकतात. विशेष म्हणजे प्रत्येक महिन्याला, तीन महिन्याला आणि सहा महिन्याला व्याज दिलं जातं.

अमृत कलश योजनेत व्याज किती?

SBIने आपल्या नियमित ग्राहकांसाठी आणि ज्येष्ठ नागरिकांसाठी अमृत कलश योजना सुरु ठेवली आहे. यामध्ये ७.१ टक्के आणि ७.६ टक्के व्याज देण्यात येतं. दोन कोटींपेक्षा कमी रिटेल एफडीवर ही सुविधा मिळते.