OBC आरक्षणाचा मुद्दा तापला; चंद्रशेखर रावण पोलिसांच्या ताब्यात

ओबीसी आरक्षणावरून (OBC Reservation) मध्य प्रदेशमध्ये राजकारण तापलंय. रविवारी ओबीसी महासभेने मुख्यमंत्री शिवराज सिंह चौहान यांच्या विरोधात निदर्शने करताना मुख्यमंत्री शिवराज सिंह चौहान यांच्या घराला घेराव करण्याचा इशारा दिला होता. या पार्श्वभूमीवर पोलिसांनी रविवारी सकाळी भीम आर्मीचे (Bhim Army) प्रमुख चंद्रशेखर आझाद रावण (Chandrashekhar Azad Ravan) यांना विमानतळावरून ताब्यात घेतलं. ओबीसी महासभेच्या अनेक नेत्यांना पोलिसांनी ताब्यात घेतलं असून, अनेकांना नजरकैदेत ठेवलं आहे. त्यांच्या अटकेनंतर रावण यांच्या समर्थकांकडून संताप व्यक्त केला जातोय.

मुख्यमंत्री शिवराज सिंह चौहान यांच्या घराला घेराव घालण्याचा इशारा दिल्यानंतर पोलिसाकडून कडेकोट बंदोबस्त लावण्यात आला आहे. सर्वत्र पोलीस बंदोबस्त असून सीएम हाऊसकडे जाणारे सर्व रस्ते बंद करण्यात आले आहेत. ओबीसी संघटनांनी 27% ओबीसी आरक्षणाची मागणी केली आहे. मात्र आता निदर्शनं करण्यापूर्वीच कार्यकर्त्यांना ताब्यात घेण्यात आल्यानं राजकारण तापलं आहे.

राज्याचे माजी मुख्यमंत्री कमलनाथ यांनी ट्विट करत शिवराज सरकारवर हल्लाबोल केला आहे. कमलनाथ म्हणाले की, पंचायत निवडणुकीत ओबीसी आरक्षणाच्या मागणीसाठी ओबीसी महासभेने आज भोपाळमध्ये निषेधाची घोषणा केली होती. पण मला कळत नाही की शिवराज सरकार ओबीसी वर्गाला का टाळत आहे, सरकार त्यांच्या दडपशाहीकडे का वळले आहे?