Gujrat ATS : नव्या वर्षात घातपाताचा प्रयत्न? हत्यारांसह १० पाकिस्तानींना अटक, कोट्यवधींचं ड्रग्जही जप्त

गुजरातच्या समुद्रात तटरक्षक दल आणि एटीएसने मोठी कारवाई केली आहे. या करवाईत भारतीय तटरक्षक दल (ICG) ने ATS गुजरातच्या गुप्त माहितीच्या आधारे शस्त्रास्त्रे, दारूगोळा आणि 10 लोकांना घेऊन भारतीय हद्दीत आलेली पाकास्तानी बोट ताब्यात घेतली आहे. या जप्त करण्यात आलेल्या बोटीवरून ३०० कोटींचे ड्रग्ज आणि १० पाकिस्तानी नागरिकांना देखील ताब्यात घेण्यात आले आहे.

ICG अधिकाऱ्यांनी सांगितले की, गुजरात एटीएसकडून एक पाकिस्तानी बोट भारतीय हद्दीत प्रवेश करत असल्याची गुप्त माहिती मिळाली होती. यानंतर, 25 आणि 26 डिसेंबरच्या रात्री एक ऑपरेशन करण्यात आले ज्यामध्ये IGC ने आपले जहाज अरिंजय पाकिस्तानच्या सागरी सीमारेषेवर तैनात केले होते.

यानंतर टीमने अल सोहेली नावाची पाकिस्तानी मासेमारी बोट अडवली. त्याची झडती घेतली असता त्याच्याकडून शस्त्र, दारूगोळा आणि 40 किलो अमली पदार्थ जप्त करण्यात आले. याची किंमत 300 कोटी रुपये अपेक्षित आहे. ICG ने पुढे माहिती दिली आहे की सध्या बोटीसह चालक दलाला पकडण्यात आले असून पुढील तपासासाठी ती ओखा येथे आणली जात आहे.

भारतीय तटरक्षक दल आणि ATS, गुजरात यांची गेल्या 18 महिन्यांतील ही सातवी संयुक्त कारवाई आहे आणि अंमली पदार्थांसह शस्त्रास्त्र आणि दारूगोळ्याच्या कथित तस्करीवरील पहिली कारवाई आहे. या कालावधीत 1930 कोटी रुपयांचे एकूण 346 किलो हेरॉईन जप्त करण्यात आले असून 44 पाकिस्तानी आणि 07 इराणी नागरिकांना अटक करण्यात आली आहे.