प्रणवदांच्या आत्मचरित्रावरुन मुला-मुलीमध्ये वाद; प्रकाशन थांबवण्याच्या सूचना

नवी दिल्ली- दिवंगत माजी राष्ट्रपती प्रणव मुखर्जी यांच्या आत्मचरित्रातील अनेक गौप्यस्फोटांमुळे राजकारण ढवळून निघाले असताना मुखर्जी यांचे पूत्र अभिजित मुखर्जी यांनी प्रकाशकांना या ग्रंथाचे प्रकाशन थांबविण्याची सूचना केली आहे. या आत्मचरित्रावरून अभिजित मुखर्जी आणि त्यांच्या भगिनी शर्मिष्ठा मुखर्जी यांच्यात वाद निर्माण झाला आहे. हे दोघेही काँग्रेसचे नेते आहेत.

या आत्मचरित्राची आपल्याला पडताळणी करायची आहे, प्रकाशकांनी लेखी परवानगी घेतल्याशिवाय हे आत्मचरित्र प्रसिद्ध करू नये असे अभिजित यांनी त्यांच्या ट्विटमध्ये म्हटले आहे. यावरून त्यांच्या भगिनी शर्मिष्ठा मुखर्जी यांनी नाराजी व्यक्त करतानाच अभिजित यांची सवंग लोकप्रियतेसाठी ही धडपड सुरू असल्याचा आरोप त्यांनी केला. अभिजित हे निष्कारण वाद निर्माण करून या पुस्तकाच्या प्रकाशनामध्ये अडथळे आणत असल्याचा आरोपही त्यांनी केला आहे.

विरोधक शेतकऱ्यांना भडकवत आहेत; PM मोदींचा गुजरातमधून आरोप
 

का आहे आक्षेप

या आत्मचरित्रातील काही उतारे हे राजकीय भावनेतून काही विशिष्ट मीडिया प्लॅटफॉर्मवर व्हायरल केले जात आहेत, यासाठी आपली परवानगी देखील घेतली जात नसल्याचा आरोप त्यांनी ट्विटच्या माध्यमातून केला. मुखर्जी यांच्या ‘दि प्रेसेडेन्शियल मेमोयर्स’ या आत्मचरित्रात अनेक राजकीय गौप्यस्फोट करण्यात आले आहेत. काँग्रेसच्या पराभवासाठी पंतप्रधान डॉ. मनमोहनसिंग आणि सोनिया गांधी जबाबदार असल्याचा दावाही त्यात करण्यात आला आहे.