Landslide : श्रावण सोमवारनिमीत्त दर्शनासाठी आलेल्या शिवभक्तांवर काळाचा घाला! मंदिरावर दरड कोसळून ५ ठार, अनेक अडकले

Shimla landslide on shiv temple today : हिमाचल प्रदेशची राजधानी शिमला येथे एक मोठी दुर्घटना घडली. सोमवारी सकाळी सात वाजता झालेल्या मुसळधार पावसामुळे शिव बावडी येथील मंदिरावर दरड कोसळली. त्यामुळे मंदिरात उपस्थित २५ हून अधिक लोक ढिगाऱ्याखाली गाडले गेले आहेत. आतापर्यंत २ मुलांसह ५ मृतदेह बाहेर काढण्यात आले आहेत. तसेच उर्वरितांचा शोध सुरू आहे.

हे मंदिर शिमलाच्या उपनगरीय भागतील बालूगंज भागात समरहिलवर आहे. श्रावण सोमवारमुळे मंदिरात सकाळपासूनच गर्दी होती.

पावसामुळे बचावकाऱ्यात अडचण

मुसळधार पावसामुळे बचावकार्यात अडचणी येत आहेत. डोंगरावरून अजूनही दगड पडत आहेत. ढिगाऱ्यासह मंदिराच्या वरती चार ते पाच झाडे उन्मळून पडली आहेत.यामुळे जास्त नुकसान झाले आहे. एनडीआरएफची टीम बचावकार्य करत आङे

सीएम सुखविंदर सिंग यांची घटनास्थळीला

हिमाचलचे मुख्यमंत्री सुकविंदर सिंग यांनी सांगितले की, आज सकाळी आठ वाजण्याच्या सुमारास मोठी दुर्घटना घडली. आतापर्यंत पाच मृतदेह बाहेर काढण्यात आले आहेत. श्रावणातील शेवटचा सोमवार असल्याने सर्व जण दर्शनासाठी आले होते. २० ते २५ लोक ढिगाऱ्याखाली अडकल्याची भीती आहे. आम्ही प्रयत्न करत आहोत की, सेना, पोलिस आणि एनडीआरएफच्या मदतीने लोकांना वाचवण्याचे प्रयत्न सुरू आहे.