Sonia Gandhi: मिझोरमचे माझ्या हृदयात वेगळे स्थान; सोनिया गांधींचे भावनिक आवाहन!

Sonia Gandhi: काँग्रेसच्या ज्येष्ठ नेत्या सोनिया गांधी यांनी आज मिझोरामच्या मतदारांना काँग्रेसला मतदान करण्याचे आवाहन केले. यासंदर्भात एक व्हिडिओद्वारे सोनिया गांधी यांनी मतदारांशी संवाद साधला.

‘‘मिझोरामचे माझ्या हृदयात एक वेगळे स्थान आहे, मिझोरामला मी अनेकदा भेटी दिल्या आहेत. मिझोरामची संस्कृती, प्रथा-परंपरा, निसर्ग सौंदर्य आणि समृद्धतेने मला नेहमीच भुरळ घातली आहे. यापेक्षाही तुमचे प्रेम व माझ्याबद्दल तुम्ही दाखविलेली सहानुभूती मी कधीही विसरू शकत नाही.’’ असे सोनिया गांधी म्हणाल्या. १९८६ मध्ये मिझो करार केल्यापासून ३० जून हा दिवस आपण रेमना दिन म्हणून साजरा करीत आहात

असे सांगत सोनिया गांधी म्हणाल्या की, ‘‘आज लोकशाही ही संकटात सापडलेली आहे, तिला भाजप व राष्ट्रीय स्वयंसेवक संघापासून धोका आहे. ते देशात समान कायदा देशात लागू करू इच्छितात. आदिवासी व इतरांचे हक्क हिरावून घेण्याचे काम भाजपचे सरकार संसदेच्या माध्यमातून करीत आहे’’ काँग्रेस पक्ष विकासाची हमी देत असल्याने काँग्रेस पक्षाच्या उमेदवारांना मतदान करावे, असे आवाहन त्यांनी या व्हिडिओच्या माध्यमातून केले आहे.