Piyush Goyal : आता लवकरच अनेक देशांशी आंतरराष्ट्रीय व्यापार रुपयात होईल; पियुष गोयल यांचं विधान

नवी दिल्ली - व्यापारी लवकरच परकीय व्यापाराचा निपटारा रुपयांत करू शकतील, अशी आशा वाणिज्य व उद्योगमंत्री पियुष गोयल यांनी शनिवारी व्यक्त केली. विविध देशांतील अनेक बँका भारतीय बँकांमध्ये विशेष खाती उघडत आहेत. भारतीय रिझर्व्ह बँकेने (आरबीआय) ब्रिटन, सिंगापूर आणि न्यूझीलंडसह १८ देशांतील संबंधित बँकांमध्ये विशेष रुपयांची खाती (एसआरव्हीए) उघडण्याच्या ६० विनंत्यांना मान्यता दिल्याचे ते म्हणाले.

पियुष गोयल म्हणाले की, मध्यवर्ती बँक विविध देशांतील आपल्या समकक्षांशी या विषयावर चर्चा करत आहे. युरोपियन युनियन, ब्रिटन आणि कॅनडा सारख्या विकसित देशांबरोबर मुक्त व्यापार कराराच्या (एफटीए) वाटाघाटी प्रगत टप्प्यात आहेत, असे गोयल यांनी येथे पत्रकारांशी बोलताना सांगितले.

वस्त्रोद्योग क्षेत्रासाठी उत्पादनाशी निगडित प्रोत्साहन योजनेच्या दुसऱ्या टप्प्याविषयी बोलताना गोयल म्हणाले की, संपूर्ण जगाला भारतासोबत व्यापक आर्थिक भागीदारी करार करायचा आहे.