Kalkaji Temple Stampede: कालकाजी मंदिरात जागरणा दरम्यान कोसळला स्टेज, चेंगराचेंगरीत १७ जण जखमी, एका महिलेचा मृत्यू, VIDEO

दिल्लीच्या कालकाजी मंदिरात जागरण सुरू असतानाच अचानक स्टेज कोसळून सुमारे १७ जण जखमी झाले आणि एका 45 वर्षीय महिलेचा मृत्यू झाला. ही घटना रात्री साडे बाराच्या सुमारास घडल्याचे सांगण्यात येत आहे. पोलिसांनी याप्रकरणी आयोजकांविरुद्ध एफआयआर नोंदवून तपास सुरू केला आहे.

पोलिसांनी दिलेल्या माहितीनुसार, 26 जानेवारी रोजी कालकाजी मंदिरात माता का जागरणाचे आयोजन करण्यात आले होते, ज्यामध्ये रात्री 12.30 च्या सुमारास 1500 ते 1600 लोकांची गर्दी जमली होती. दरम्यान, जमाव आयोजक आणि व्हीआयपींच्या कुटुंबीयांसाठी बनवलेल्या स्टेजवर चढला, त्यानंतर स्टेज खाली कोसळला. या अपघातात स्टेजखाली बसलेले 17 जण जखमी झाले. जखमींना उपचारासाठी रुग्णालयात दाखल करण्यात आले.

या घटनेत एका महिलेचा मृत्यू

पोलिसांनी दिलेल्या माहितीनुसार, दोघांनी अपघातात जखमी झालेल्या ४५ वर्षीय महिलेला ऑटोमधून मॅक्स हॉस्पिटलमध्ये नेले, जिथे डॉक्टरांनी तिला मृत घोषित केले. मात्र, अद्याप महिलेची ओळख पटलेली नाही.

गायक बी प्राक याला पाहण्यासाठी झाली होती गर्दी

या जागरणमध्ये प्रसिद्ध बॉलिवूड गायक बी प्राक पोहोचला होता, त्याला पाहण्यासाठी गर्दी जमली होती. दरम्यान, मंदिर परिसरात चेंगराचेंगरी झाली.

कार्यक्रमाच्या आयोजनाला परवानगी नव्हती : पोलीस

हा कार्यक्रम आयोजित करण्यासाठी कोणतीही परवानगी देण्यात आली नव्हती, असेही पोलिसांचे म्हणणे आहे. मात्र, कायदा व सुव्यवस्था राखण्यासाठी पुरेसा पोलीस बंदोबस्त तैनात करण्यात आला होता.

पोलिसांनी आयोजकांविरुद्ध भारतीय दंड संहितेच्या कलम ३३७/३०४ अ/१८८ अन्वये गुन्हा दाखल केला असून या प्रकरणाचा तपास सुरू केला आहे.