Supreme Court : वसीम रिझवी-यती नरसिंहानंदांच्या अटकेची याचिका स्वीकारण्यास SC चा नकार

नवी दिल्ली : जितेंद्र त्यागी (Jitendra Tyagi) ऊर्फ ​​वसीम रिझवी आणि यती नरसिंहानंद (Yeti Narasimhananda) यांना अटक करण्याची मागणी करणाऱ्या भारतीय मुस्लिम शिया इस्ना अशारी जमातच्या याचिकेवर सुनावणी घेण्यास सर्वोच्च न्यायालयानं (Supreme Court) नकार दिलाय. त्यागी यांच्या 'मुहम्मद' या पुस्तकावर बंदी घालण्याची मागणीही याचिकाकर्त्यानं केलीय.

'जगातील प्रत्येक व्यक्तीनं माझं पुस्तक वाचावं'

याआधी रिझवी यांनी यूट्यूब चॅनलवरील संभाषणात अनेक गोष्टी सांगितल्या होत्या. आपल्या पुस्तकाबाबत ते म्हणाले, मुस्लिमांसह जगातील प्रत्येक व्यक्तीनं माझं पुस्तक वाचलं पाहिजे. जर कोणी हे पुस्तक वाचलं, तर तो इस्लाम स्वीकारणार नाही, असं त्यांनी स्पष्ट केलं.

पुस्तकात लिहिलेल्या गोष्टींचे 350 संदर्भ दिले आहेत, असा त्यांचा दावा आहे. हे पुस्तक वाचणं अत्यंत गरजेचं असल्याचंही त्यांनी सांगितलं. मला जी लपलेली तथ्ये पटकन सापडत नव्हती, ती सापडली असून ती पुराव्यासह अधोरेखित केली आहेत, त्यात पुस्तकांचे 350 संदर्भ आहेत, असंही ते म्हणाले.