Samajwadi Party : भाजप मला ठार मारण्याची सुपारी देतंय; 'समाजवादी'च्या बड्या नेत्याचा गंभीर आरोप

Lucknow News : समाजवादी पक्षाचे राष्ट्रीय सरचिटणीस आणि आमदार स्वामी प्रसाद मौर्य (Swami Prasad Maurya) यांनी भाजपवर (BJP) गंभीर आरोप केलाय.

भाजप सरकारला मला ठार मारायचं आहे, असं त्यांनी म्हटलंय. माझ्या नावावर सुपारी दिली जात आहे. विशेष वर्गातील लोक मला मारण्याचं कंत्राट देत आहेत, असा आरोपही त्यांनी केलाय.

स्वामी प्रसाद मौर्य म्हणाले, गुन्हेगारी प्रवृत्तीचे लोक साधूच्या वेशात कारस्थान रचत आहेत. मात्र, सरकार काहीच करत नाहीये. मला ठार मारण्यासाठी सुपारी दिली जात आहे. माझ्या सुरक्षेसाठी मी पंतप्रधान आणि राष्ट्रपतींना पत्र पाठवलंय. याबाबत मुख्यमंत्री आणि प्रधान सचिवांना देखील पत्र पाठवण्यात आल्याचं त्यांनी सांगितलं.

विशेष म्हणजे, बुधवारी लखनौमध्ये एका टीव्ही चॅनलच्या कार्यक्रमानंतर हनुमान गढीचे समर्थक, अयोध्येचे पुजारी राजू दास आणि स्वामी प्रसाद मौर्य यांच्या समर्थकांत हाणामारी झाली. दरम्यान, स्वामी प्रसाद यांनी लखनौच्या पोलीस आयुक्तांना पत्र लिहून याची तक्रार केली होती.