TET Exam: टीईटी प्रकरणी ‘जैसे थे’चे सर्वोच्च न्यायालयाचे आदेश

औरंगाबाद: शिक्षक पात्रता परीक्षेला आव्हान देणाऱ्या याचिका मुंबई उच्च न्यायालयाच्या औरंगाबाद खंडपीठाने नुकत्याच फेटाळल्या होत्या. खंडपीठाच्या सदर आदेशाला आव्हान देणाऱ्या विशेष अनुमती अर्जाच्या अनुषंगाने आहे ती परिस्थिती ठेवण्याचा आदेश सर्वोच्च न्यायालयाचे न्या. एल. नागेश्वरराव आणि न्या. अनिरुद्ध बोस यांनी सोमवारी (ता.६) दिला.

सर्वोच्च न्यायालयाने याचिकाकर्त्यांना विशेष अनुमती अर्ज दाखल करण्यास परवानगी दिली. तसेच प्रतिवाद्यांना नोटिसा बजावण्याचा आदेश दिला. प्रतिवाद्यांना ६ ऑगस्टपर्यंत उत्तर दाखल करावयाचे आहे. याचिकाकर्त्यांच्या विनंतीवरून औरंगाबाद खंडपीठाने आपल्या आदेशास ४ आठवड्यांची अंतरिम स्थगिती दिलेली आहे.

दरम्यान ‘आहे ती परिस्थिती’ ठेवण्याचा आदेश सर्वोच्च न्यायालयाने दिला आहे. सर्वोच्च न्यायालयात याचिकाकर्त्यांच्यावतीने ज्येष्ठ विधिज्ञ कपिल सिब्बल, ॲड. शिवाजी जाधव, ॲड. विष्णू मदन पाटील आदींनी काम पाहिले.