आधी भाजप प्रवेश, नंतर काँग्रेसच्या सदस्यत्वाचा राजीनामा

लखनऊ - उत्तर प्रदेश विधानसभा निवडणुकीचं बिगुल वाजल्यानंतर आता नेत्यांच्या पक्षांतराला जोर आला आहे. समाजवादी पक्षाचे नेते मुलायम सिंह यादव यांची सून अपर्णा यादव यांनी बुधवारी भाजपमध्ये प्रवेश केला. त्यानतंर आज आणखी एक माजी आमदार प्रमोद गुप्ता आणि काँग्रेस नेत्या प्रियांका मौर्य यांनी भाजपमध्ये एंट्री केली. त्यातच आता काँग्रेसला रायबरेलीत धक्का बसला आहे. रायबरेलीच्या आमदार आदिती सिंह यांनी काँग्रेसच्या सदस्यत्वाचा राजीनामा दिला आहे.

आदिती सिहं यांनी काँग्रेस अध्यक्षा सोनिया गांधी यांना पत्र लिहून राजीनामा देत असल्याचं सांगितलं आहे. त्यांनी म्हटलं की,'मी भारतीय राष्ट्रीय काँग्रेसच्या सदस्यत्वाचा राजीनामा देत आहे. माझा राजीनामा स्वीकारण्यात यावा.' याआधीच आदिती सिंह यांनी फेसबुकवर एक पोस्ट केली होती. त्यात फक्त एकच शब्द लिहिला होता. सब्र.

आदिती सिंह यांनी याआधीच भाजपमध्ये प्रवेश केला होता. मात्र त्यांनी काँग्रेस सदस्यत्वाचा राजीनामा दिला नव्हता. विधानसभेचं सदस्यत्व यामुळे धोक्यात आलं असतं म्हणूनच त्यांनी काँग्रेसला राजीनामा दिला नव्हता.