Uttarakhand Flood : उत्तराखंडमध्ये पुरामुळे चौघांचा मृत्यू; १५ बेपत्ता

रुद्रप्रयाग : उत्तराखंडमधील केदारनाथ मार्गावरील गौरीकुंडजवळील दात पुलिया येथे मुसळधार पावसामुळे अचानक आलेल्या पुरामुळे चौघांचा मृत्यू झाला, तसेच इतर पंधरा जण बेपत्ता झाले. तर तीन दुकानेही वाहून गेली.

मुख्यमंत्री पुष्करसिंह धामी यांनी परिस्थितीचा आढावा घेत बचावकार्याचा वेग वाढविण्याची सूचनाही केली. दरड कोसळण्याचा धोका असलेल्या ठिकाणी राहणाऱ्या लोकांचे सुरक्षितस्थळी स्थलांतर करण्याचे आदेशही त्यांनी दिले.

रुपनगरचे जिल्हा दंडाधिकारी सौरभ गहरवार यांनी सांगितले, गौरीकुंडजवळ पुरात चौघांचा मृत्यू झाला. त्यांचे मृतदेह बाहेर काढले असून बेपत्ता असलेल्या पंधराजणांचा शोध सुरू आहे. या ठिकाणी राष्ट्रीय आपत्ती प्रतिसाद दल आणि राज्य आपत्ती प्रतिसाद दलाकडून मदत व बचावकार्य राबविले जात आहे.