ममतांनी नंदीग्राममधून भरला अर्ज; सुवेंदू म्हणाले, "मतदानही करु शकत नाहीत"

नवी दिल्ली

West Bengal Election 2021: पश्चिम बंगालच्या मुख्यमंत्री ममता बॅनर्जी यांनी नंदीग्राम (Nandigram) येथून आज आपला निवडणूक अर्ज भरला. तत्पूर्वी सुवेंदू अधिकारी यांनी ममतांवर टीकास्त्र सोडलं आणि बाहेरची व्यक्ती असल्याचा दावा केला. 

अर्ज भरल्यानंतर जनतेला भावनिक आवाहन करताना ममता म्हणाल्या, "नंदीग्राम माझ्यासाठी नवं नाही, एकवेळ मी माझं नाव विसरु शकेन पण नंदीग्रामला नाही. नंदीग्रामच्या आया, बहिणींनी मला लक्षात ठेवावं आणि बंगालमध्ये तृणमूलचाच विजय होईल हे पाहावं. मला नंदीग्रामच्या जनतेचा आशीर्वाद पाहिजे, सर्व समुदयांवर माझं एकसारखचं प्रेम आहे." 

दरम्यान, तृणमुल काँग्रेसमधून भाजपात दाखल झालेले सुवेंदू अधिकारी हे नंदीग्राममधून ममतांविरोधात १२ मार्च रोजी अर्ज भरणार आहेत. तत्पूर्वी त्यांनी आज (बुधवार) नंदीग्राममधील आपल्या निवडणूक कार्यालयाचं उद्घाटन केलं. तसेच ममतांवर टीकास्त्र सोडताना म्हणाले, "ममता या बाहेरच्या व्यक्ती आहेत त्यामुळे त्यांना इथून मतदानही करता येणार नाही" 

नंदीग्राममध्ये अर्ज भरण्यापूर्वी ममता बॅनर्जी यांनी शिवमंदिराला भेट दिली आणि तिथे पूजाअर्चा तसेच जलाभिषेक केला. तर दुसरीकडे रोड शो पूर्वी भाजपा उमेदवार सुवेंदू अधिकारी यांनी हनुमान मंदिराज जाऊन दर्शन घेतले.