Crime News: कामावरुन आलेल्या पतीला जेवण देण्यास पत्नीने केला उशीर अन् गेले दोन जीव; वाचा धक्कादायक घटना

लखनऊ- उत्तर प्रदेशातून दररोज काही विचित्र आणि धक्कादायक घटना समोर येत असतात. अशीच एक घटना यूपीच्या सीतापूरमधून समोर आली आहे. जेवण मिळायला उशीर झाल्याने पतीने आधी आपल्या पत्नीची हत्या केलीये, त्यानंतर स्वत: देखील आत्महत्या केली आहे. पतीने गळफास घेऊन जीवल संपवलं आहे.(Wife delayed to give food to her husband who came from work two lives were lost)

पोलिसांनी दिलेल्या माहितीनुसार, थानगांव पोलीस स्टेशन क्षेत्रातील कोटवालनपुरवा गावात ही घटना घडली आहे. ३० वर्षीय व्यक्ती कामावरुन घरी आला होता. त्याने पत्नीकडे जेवण मागितलं. पत्नीकडून जेवण देण्यास थोडा उशीर झाला. यावरुन दोघामध्ये भांडण सुरु झाले. वाद इतका टोकाला गेला की पतीने धारधार शस्त्राने पत्नीची हत्या केली आहे. त्यानंतर स्वत: देखील गळफास घेऊन आत्महत्या केली आहे.

थानंगाव पोलीस स्टेशनचे प्रभारी हनुमंत लाल तिवारी यांनी यासंदर्भातील अधिक माहिती दिली. ते म्हणाले की पतीचे नाव परसराम आहे तर पत्नीचे नाव प्रेमा देवी (वय २८) आहे. रागाच्या भरात पतीने पत्नीची धारदार शस्त्राने हत्या केली. त्यानंतर तुरुंगात जाण्याच्या भीतीने स्वत:ला देखील संपवलं आहे. या घटनेमुळे परिसरात एकच खळबळ उडाली आहे.

परसराम हा शेतकरी होता. तो शेतात काम करुन घरी आला होता. घरी आल्यानंतर त्याने पत्नीकडे जेवण मागितले. दुपारचे जेवण प्रेमा देवीने तयार केले नव्हते. त्यामुळे जेवण बनवून ते परसरामला वाढण्यास उशीर झाला. भुकेजलेल्या पतीला याचा प्रचंड राग आला होता. दोघांमध्ये कडाक्याचे भांडण सुरु झाले. यावेळी परसरामने घरातील एक धारदार शस्त्र बाहेर काढले आणि पत्नीवर सपासप वार केले. यात प्रेमा देवीचा मृत्यू झालाय.

गावकऱ्यांनी सांगितलं की, सदर घटनेनंतर लोक परसरामच्या घराभोवती जमा झाले होते. परसराम याने स्वत:ला एका खोलीमध्ये बंद करुन घेतले होते. त्यानंतर पोलिसांच्या भीतीने त्याने खोलीमध्येच गळफास घेऊन आत्महत्या केली आहे. पोलिसांनी सांगितलं की, दोघांचे मृतदेह पोस्टमार्टमसाठी पाठवण्यात आले आहेत. अधिक तपास केला जात आहे. (Latest Marathi News)